ట్రంప్ శాంతి సందేశంతో టెహ్రాన్ చేరుకున్న పాక్ ఆర్మీ చీఫ్

అమెరికా, ఇరాన్‌ల మధ్య తీవ్రమవుతున్న ఉద్రిక్తతలను తగ్గించేందుకు పాకిస్థాన్ కీలక మధ్యవర్తి పాత్ర పోషిస్తోంది. ఇందులో భాగంగా, పాక్ సైన్యాధిపతి జనరల్ ఆసిమ్ మునీర్.. అమెరికా అధ్యక్షుడు డొనాల్డ్ ట్రంప్ పంపిన ప్రత్యేక శాంతి ప్రతిపాదనతో టెహ్రాన్‌ చేరుకున్నారు. ఇరు దేశాల మధ్య నెలకొన్న యుద్ధ వాతావరణాన్ని చల్లార్చేందుకు ఆయన ఈ దౌత్య ప్రయత్నాలను ముమ్మరం చేశారు.

ఇరు దేశాల మధ్య ఇస్లామాబాద్‌లో జరిగిన తొలి విడత చర్చలు ఆశించిన ఫలితాలను ఇవ్వలేదు. ఈ నేపథ్యంలో, ప్రతిష్టంభనను తొలగించేందుకు ఆసిమ్ మునీర్ నేరుగా ఇరాన్ వెళ్లి చర్చలు జరుపుతున్నారు. ప్రస్తుతం అమల్లో ఉన్న రెండు వారాల కాల్పుల విరమణ గడువు ముగియకముందే శాశ్వత ఒప్పందం కుదుర్చుకోవడం ఈ చర్చల ప్రధాన లక్ష్యం.

ఈ శాంతి ప్రయత్నాల్లో ఆసిమ్ మునీర్ పోషిస్తున్న పాత్రను అమెరికా అధ్యక్షుడు డొనాల్డ్ ట్రంప్ స్వయంగా ప్రశంసించారు. ఆయనను ‘ఫెంటాస్టిక్’ అని అభివర్ణించారు. అమెరికా తరఫున ఉపాధ్యక్షుడు జేడీ వాన్స్ ఈ చర్చల్లో కీలకంగా వ్యవహరిస్తున్నారు. రెండో విడత చర్చలు కూడా ఇస్లామాబాద్‌లోనే జరిగే అవకాశం ఉందని ట్రంప్ సూచించినట్లు తెలుస్తోంది.

అయితే, ఇరాన్ తన అణు కార్యక్రమాలను పూర్తిగా నిలిపివేయాలన్న అమెరికా డిమాండ్‌పై ప్రతిష్టంభన ఇంకా కొనసాగుతోంది. ఈ క్లిష్టమైన సమయంలో ఆసిమ్ మునీర్ మధ్యవర్తిత్వం ఇరు దేశాలను ఏ మేరకు ఏకాభిప్రాయానికి తీసుకువస్తుందోనని అంతర్జాతీయ వర్గాలు ఆసక్తిగా గమనిస్తున్నాయి.