కరోనా రెండో డోస్ నన్ను చంపేసినంత పనిచేసింది: ఎలాన్ మస్క్ సంచలన వ్యాఖ్యలు

టెస్లా అధినేత ఎలాన్ మస్క్ చేసిన ఒకే ఒక్క పోస్ట్ ఇప్పుడు ప్రపంచవ్యాప్తంగా కొవిడ్ వ్యాక్సిన్‌పై కొత్త చర్చకు దారితీసింది. ఫైజర్ కంపెనీకి చెందిన కొవిడ్ వ్యాక్సిన్ రెండో డోసు తీసుకున్నప్పుడు అది తనను చంపేసినంత పనిచేసిందని, ఆసుపత్రిలో చేరాల్సి వస్తుందేమోనని భయపడ్డానని ఆయన సంచలన వ్యాఖ్యలు చేశారు. జర్మనీ పార్లమెంటులో ఫైజర్ మాజీ సైంటిస్ట్ ఒకరు చేసిన ఆరోపణల వీడియోను షేర్ చేస్తూ మస్క్ ఈ వ్యాఖ్యలు చేయడంతో వివాదం రాజుకుంది.

ఏమిటీ వివాదం?
ఫైజర్ కంపెనీలో ఒకప్పుడు టాక్సికాలజీ విభాగాధిపతిగా పనిచేసిన డాక్టర్ హెల్మట్ స్టెర్జ్, మార్చి 19న జర్మనీ పార్లమెంటరీ కమిషన్ ముందు కీలక ఆరోపణలు చేశారు. ఫైజర్-బయోఎన్‌టెక్ అభివృద్ధి చేసిన ఎంఆర్ఎన్ఏ (mRNA) వ్యాక్సిన్‌కు అసలు అనుమతి ఇచ్చి ఉండాల్సింది కాదని ఆయన వాదించారు. క్యాన్సర్ కారక (కార్సినోజెనిసిటీ), పునరుత్పత్తి వ్యవస్థపై ప్రభావం వంటి కీలకమైన భద్రతా పరీక్షలు చేయకుండానే వ్యాక్సిన్‌ను ఆమోదించారని తెలిపారు.

జర్మనీలో వ్యాక్సిన్ తీసుకున్న తర్వాత సుమారు 2,133 మరణాలు నమోదయ్యాయని అధికారిక గణాంకాలు చెబుతున్నాయి. అయితే, వాస్తవానికి నమోదైన వాటికంటే 30 రెట్లు ఎక్కువ ఘటనలు బయటకు రావని ఒక అమెరికన్ అంచనాను ఉటంకిస్తూ స్టెర్జ్ ఈ సంఖ్యను 30తో గుణించారు. దీని ప్రకారం జర్మనీలో దాదాపు 60,000 మరణాలు సంభవించి ఉండవచ్చని ఆయన అంచనా వేశారు. ఈ ఆరోపణలను జర్మనీ ఆరోగ్య మంత్రి కార్ల్ లాటర్‌బాచ్ వెంటనే ఖండించారు.

నిపుణులు ఏమంటున్నారు?
అయితే, స్టెర్జ్ లెక్క ఒక అంచనా మాత్రమేనని, అది శాస్త్రీయంగా నిరూపితమైన అధ్యయనం కాదని నిపుణులు స్పష్టం చేస్తున్నారు. వ్యాక్సిన్ తీసుకున్న తర్వాత జరిగిన మరణాలన్నీ వ్యాక్సిన్ వల్లే జరిగాయని చెప్పలేమని, అమెరికాలోని రిపోర్టింగ్ విధానానికి సంబంధించిన గుణకాన్ని జర్మనీకి వర్తింపజేయడం సరికాదని విశ్లేషకులు అంటున్నారు. మరోవైపు, వ్యాక్సిన్ల ప్రయోజనాలు వాటి రిస్క్‌ల కంటే చాలా ఎక్కువని యూరోపియన్ మెడిసిన్స్ ఏజెన్సీ వంటి సంస్థలు స్పష్టం చేస్తున్నాయి. కొవిడ్ సోకడం వల్ల గుండె సంబంధిత సమస్యలు (మయోకార్డైటిస్) వచ్చే ప్రమాదం, వ్యాక్సిన్ వల్ల వచ్చే ప్రమాదం కంటే 10 రెట్లు ఎక్కువని స్టాన్‌ఫోర్డ్ మెడిసిన్ అధ్యయనం పేర్కొంది.