ఓటీటీలోకి 'ఉస్తాద్ భగత్ సింగ్'.. స్ట్రీమింగ్ డేట్ ఫిక్స్

పవర్ స్టార్ పవన్ కల్యాణ్ అభిమానులు ఎంతో ఆసక్తిగా ఎదురుచూస్తున్న ‘ఉస్తాద్ భగత్ సింగ్’ చిత్రం డిజిటల్ స్ట్రీమింగ్‌కు సిద్ధమైంది. థియేటర్లలో సంద‌డి చేసిన‌ ఈ సినిమా ఓటీటీ హక్కులను ప్రముఖ సంస్థ నెట్‌ఫ్లిక్స్ దక్కించుకున్న విషయం తెలిసిందే. తాజాగా ఈ సినిమా స్ట్రీమింగ్ తేదీని అధికారికంగా ప్రకటించారు.

ఈ చిత్రాన్ని ఏప్రిల్ 16వ తేదీ నుంచి నెట్‌ఫ్లిక్స్‌లో స్ట్రీమింగ్ చేయనున్నట్లు చిత్ర బృందం వెల్లడించింది. తెలుగుతో పాటు తమిళం, మలయాళం, క‌న్న‌డ‌, హిందీ భాషల్లోనూ ఈ సినిమా అందుబాటులో ఉండనుంది. భారీ ధరకు నెట్‌ఫ్లిక్స్ ఈ సినిమా డిజిటల్ రైట్స్‌ను కొనుగోలు చేసినట్లు సమాచారం.

‘ఉస్తాద్ భగత్ సింగ్’ చిత్రం మార్చి 19న ఉగాది పండుగ కానుకగా థియేటర్లలో విడుదలైంది. విడుదలైన నాటి నుంచి బాక్సాఫీస్ వద్ద మంచి వసూళ్లను సాధించి ప్రేక్షకులను ఆకట్టుకుంది. ఈ సినిమాలో పవన్ సరసన శ్రీలీల, రాశీ ఖన్నా హీరోయిన్లుగా నటించారు. ప్ర‌ముఖ‌ దర్శకుడు హరీశ్‌ శంకర్ ఈ చిత్రానికి దర్శకత్వం వహించగా, రాక్ స్టార్ దేవిశ్రీ ప్రసాద్ సంగీతం అందించారు. థియేటర్లలో ఈ సినిమాను మిస్ అయిన వారు ఇప్పుడు ఓటీటీలో చూసేందుకు ఆసక్తిగా ఎదురుచూస్తున్నారు.