ట్రంప్ కుటుంబ క్రిప్టో సామ్రాజ్యం.. ఆరు నెలల్లోనే రూ. 6,700 కోట్ల లాభం!

అమెరికా అధ్యక్షుడు డొనాల్డ్ ట్రంప్ కుటుంబానికి చెందిన క్రిప్టోకరెన్సీ వ్యాపారం కేవలం ఆరు నెలల వ్యవధిలోనే కళ్లుచెదిరే లాభాలను ఆర్జించింది. దాదాపు 802 మిలియన్ డాలర్లు (సుమారు రూ.6,700 కోట్లు) ఆర్జించినట్లు నివేదికలు వెల్లడిస్తున్నాయి. విశేషమేమిటంటే, దశాబ్దాలుగా ట్రంప్ ఆర్గనైజేషన్‌కు ప్రధాన ఆదాయ వనరుగా ఉన్న రియల్ ఎస్టేట్, గోల్ఫ్ కోర్సుల ఆదాయాన్ని కూడా ఈ క్రిప్టో వ్యాపారం అధిగమించింది.

ట్రంప్ కుటుంబానికి చెందిన ‘వరల్డ్ లిబర్టీ ఫైనాన్షియల్’ అనే సంస్థ ఈ ఆదాయాన్ని ఆర్జించింది. ఇందులో 463 మిలియన్ డాలర్లు కంపెనీ టోకెన్ల విక్రయాల ద్వారా రాగా, '$TRUMP' పేరుతో ఉన్న ఒక మెమెకాయిన్ ద్వారా మరో 336 మిలియన్ డాలర్లు సమకూరాయి. ఈ టోకెన్ల అమ్మకాల ద్వారా వచ్చే నికర లాభంలో ట్రంప్ కుటుంబ సంస్థకు 75 శాతం వాటా ఉన్నట్లు తెలుస్తోంది. అయితే, ఈ భారీ లాభాల కన్నా ఈ సంస్థలో పెట్టుబడులు పెట్టిన వారి వివరాలు ఇప్పుడు తీవ్ర వివాదానికి, అనుమానాలకు దారితీస్తున్నాయి.

ట్రంప్ అధ్యక్షుడిగా ప్రమాణ స్వీకారం చేయడానికి ముందే, యునైటెడ్ అరబ్ ఎమిరేట్స్(యూఏఈ) జాతీయ భద్రతా సలహాదారు షేక్ తహ్నూన్ బిన్ జాయెద్ అల్ నహ్యాన్‌కు చెందిన ఒక సంస్థ ఇందులో 49 శాతం వాటాను 500 మిలియన్ డాలర్లకు కొనుగోలు చేయడం సంచలనం సృష్టిస్తోంది. అంతేకాకుండా, క్రిప్టో వ్యాపారి జస్టిన్ సన్ భారీగా ట్రంప్ టోకెన్లు కొనడం, ఆ తర్వాత ఆయనపై అమెరికా సెక్యూరిటీస్ అండ్ ఎక్స్ఛేంజ్ కమిషన్ (ఎస్ఈసీ) దర్యాప్తును నిలిపివేయడం కూడా చర్చనీయాంశంగా మారింది.

అధ్యక్షుడిగా ఉంటూనే, తన కుటుంబ వ్యాపారంలోకి విదేశీ ప్రభుత్వాలు, ప్రముఖుల నుంచి భారీగా నిధులు రావడం ‘ప్రయోజనాల ఘర్షణ’కు దారితీస్తుందని నైతిక నిపుణులు, ప్రతిపక్షాలు ఆందోళన వ్యక్తం చేస్తున్నాయి. ట్రంప్ ప్రభుత్వం క్రిప్టో రంగానికి అనుకూలంగా తీసుకుంటున్న నిర్ణయాల వెనుక ఈ పెట్టుబడుల ప్రభావం ఉండొచ్చని సెనేటర్ ఎలిజబెత్ వారెన్ వంటి నేతలు విమర్శిస్తున్నారు. దీంతో అధ్యక్ష పదవికి, వ్యక్తిగత వ్యాపార ప్రయోజనాలకు మధ్య గీత చెరిగిపోతోందని ఆరోపణలు వెల్లువెత్తుతున్నాయి.