'మృత్యుంజయ్' అడ్వాన్స్ బుకింగ్స్ జోరు.. రేపే థియేటర్లలోకి శ్రీవిష్ణు కొత్త సినిమా

యంగ్ హీరో శ్రీవిష్ణు ప్రధాన పాత్రలో నటించిన తాజా చిత్రం 'మృత్యుంజయ్'. విభిన్నమైన కథాంశంతో రూపొందిన ఈ సినిమా రేపు (మార్చి 6) ప్రపంచవ్యాప్తంగా థియేటర్లలో విడుదల కానుంది. ఈ నేపథ్యంలో ప్రారంభమైన అడ్వాన్స్ బుకింగ్స్‌కు ప్రేక్షకుల నుంచి అద్భుతమైన స్పందన లభిస్తోంది. పలు ప్రధాన కేంద్రాల్లో టికెట్లు వేగంగా అమ్ముడవుతున్నాయని, 'ఫాస్ట్ ఫిల్లింగ్' ట్రెండ్ కనిపిస్తోందని చిత్ర బృందం తెలిపింది.

భారత్‌లో రేపు విడుదల కానుండగా, ఓవర్సీస్‌లో ఒకరోజు ముందుగానే, అంటే నేటి (మార్చి 5) నుంచే ప్రీమియర్ షోలు మొదలయ్యాయి. శ్లోకా ఎంటర్‌టైన్‌మెంట్స్, వైబ్రెంట్ సినిమాస్ సంస్థలు ఈ చిత్రాన్ని విదేశాల్లో విడుదల చేస్తున్నాయి. అక్కడ కూడా బుకింగ్స్‌కు మంచి స్పందన వస్తున్నట్లు సమాచారం.

హుస్సేన్ షా కిరణ్ దర్శకత్వం వహించిన ఈ సినిమాలో శ్రీవిష్ణు సరసన రెబా మోనికా జాన్ హీరోయిన్‌గా నటించారు. కాలభైరవ సంగీతం అందించారు. ఎప్పుడూ కొత్తదనం నిండిన కథలను ఎంచుకునే శ్రీవిష్ణు నుంచి వస్తున్న సినిమా కావడంతో 'మృత్యుంజయ్'పై ప్రేక్షకుల్లో మంచి అంచనాలు నెలకొన్నాయి. ఈ పాజిటివ్ బజ్‌తోనే ఈ చిత్రం రేపు ప్రేక్షకుల ముందుకు రాబోతోంది.