నాన్నా... మీ ప్రోత్సాహమే నాకు సర్వస్వం: చిరంజీవికి రామ్ చరణ్ ఎమోషనల్ రిప్లయ్

తన తండ్రి మెగాస్టార్ చిరంజీవి తనపై కురిపించిన ప్రశంసలకు గ్లోబల్ స్టార్ రామ్ చరణ్ భావోద్వేగంగా స్పందించారు. రామ్ చరణ్ హీరోగా నటిస్తున్న 'పెద్ది' సినిమా నుంచి ఇటీవల విడుదలైన 'రై రై రా రా' ఇంట్రడక్షన్ సాంగ్‌పై మెగాస్టార్ చిరంజీవి తన ఎక్స్ ఖాతాలో ఓ సుదీర్ఘ పోస్ట్ చేసిన సంగతి తెలిసిందే.

కొడుకు డ్యాన్స్ చూసి మురిసిపోయిన చిరంజీవి, ఆ పాట అద్భుతంగా ఉందని కొనియాడారు. "'పెద్ది' నుంచి వచ్చిన 'రై రై రా రా' పాట తెరపై నిప్పులు చెరిగింది. ఎనర్జీ, ఎమోషన్, సినిమాటిక్ బ్రిలియన్స్‌ల అద్భుతమైన కలయిక ఇది. రామ్ చరణ్ తన గ్రేస్, విద్యుత్ వేగంతో తెరపై వెలిగిపోతుంటే చూడటం నాకు ఎంతో గర్వంగా ఉంది. అతను డ్యాన్స్ చేసే విధానం కనుల విందు చేసింది" అని చిరంజీవి పేర్కొన్నారు.

ఈ అద్భుతమైన పాటను తెరకెక్కించిన దర్శకుడు బుచ్చిబాబు సానా, మ్యాజికల్ కంపోజిషన్ అందించిన ఏఆర్ రెహమాన్, పవర్ ప్యాక్డ్ కొరియోగ్రఫీ చేసిన జానీ మాస్టర్‌లకు చిరంజీవి ప్రత్యేక అభినందనలు తెలిపారు. అలాగే, అద్భుతమైన విజువల్స్ అందించిన సినిమాటోగ్రాఫర్ ఆర్. రత్నవేలు, అర్థవంతమైన సాహిత్యం రాసిన అనంత శ్రీరామ్, ఈ భారీ ప్రాజెక్టును నిర్మిస్తున్న వెంకట సతీష్ కిలారును కూడా ఆయన ప్రశంసించారు. 'పెద్ది' చిత్ర బృందం మరిన్ని మైలురాళ్లు అందుకోవాలని ఆకాంక్షించారు.

తండ్రి నుంచి వచ్చిన ఈ ప్రశంసల పోస్టుకు రామ్ చరణ్ హార్ట్ ఎమోజీతో వినమ్రంగా స్పందించారు. "థ్యాంక్యూ నాన్నా. మీ ప్రోత్సాహమే నాకు సర్వస్వం. ఇది నన్ను నేల మీదే ఉండేలా, మరింత కష్టపడి పనిచేసేలా, ఎప్పటికప్పుడు ఉన్నత ప్రమాణాలను నెలకొల్పేలా గుర్తుచేస్తుంది" అని ఎమోషనల్ రిప్లయ్ ఇచ్చారు.

బుచ్చిబాబు సానా దర్శకత్వంలో రూపుదిద్దుకుంటున్న 'పెద్ది' చిత్రంపై అభిమానుల్లో భారీ అంచనాలు నెలకొన్నాయి. ఈ సినిమాలో రామ్ చరణ్ సరసన జాన్వీ కపూర్ హీరోయిన్‌గా నటిస్తుండగా, కన్నడ స్టార్ శివ రాజ్‌కుమార్, జగపతి బాబు, దివ్యేందు శర్మ, బోమన్ ఇరానీ వంటి ప్రముఖ నటులు కీలక పాత్రల్లో కనిపించనున్నారు. వృద్ధి సినిమాస్ పతాకంపై వెంకట సతీష్ కిలారు నిర్మిస్తున్న ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సమర్పిస్తున్నాయి. ఈ చిత్రం ఈ ఏడాది ఏప్రిల్ 30న ప్రపంచవ్యాప్తంగా థియేటర్లలోకి రానుంది.