ఇది నా జీవితంలోనే గొప్ప రోజు.. భావోద్వేగానికి గురైన సంజూ శాంసన్

టీ20 ప్రపంచకప్‌లో భారత జట్టు సెమీఫైనల్‌లోకి అడుగుపెట్టింది. కోల్‌కతాలోని ఈడెన్ గార్డెన్స్‌లో వెస్టిండీస్‌తో జరిగిన క్వార్టర్ ఫైనల్ మ్యాచ్‌లో సంజూ శాంసన్ అద్భుతమైన ఇన్నింగ్స్‌తో జట్టుకు చారిత్రక విజయాన్ని అందించాడు. కేవలం 50 బంతుల్లో 97 పరుగులు చేసి అజేయంగా నిలిచిన శాంసన్ మ్యాచ్ అనంతరం తీవ్ర భావోద్వేగానికి గురయ్యాడు.

"ఇది నా జీవితంలో అత్యంత గొప్ప రోజుల్లో ఒకటి. దేశం కోసం ఆడాలని కలలు కన్నప్పటి నుంచి ఈ రోజు కోసమే ఎదురుచూస్తున్నాను" అని 'ప్లేయర్ ఆఫ్ ది మ్యాచ్' అవార్డు అందుకున్న తర్వాత శాంసన్ అన్నాడు. తన కెరీర్‌లో ఎన్నో ఎత్తుపల్లాలు చూశానని, తన సామర్థ్యంపై చాలాసార్లు సందేహాలు కలిగినా, నమ్మకాన్ని ఎప్పుడూ కోల్పోలేదని తెలిపాడు.

195 పరుగుల భారీ లక్ష్య ఛేదనలో కీలక సమయంలో వికెట్లు పడుతున్నా సంజూ సంయమనంతో ఆడాడు. శాంసన్ తన అనుభవాన్ని రంగరించి జట్టును విజయతీరాలకు చేర్చాడు. "విరాట్ కోహ్లీ, రోహిత్ శర్మ వంటి దిగ్గజాల ఆటను చూస్తూ ఎంతో నేర్చుకున్నాను. ఆ అనుభవమే ఈ క్లిష్ట పరిస్థితుల్లో నాకు సహాయపడింది. వికెట్లు పడుతున్నప్పుడు భాగస్వామ్యం నిర్మించడంపై దృష్టి పెట్టాను" అని వివరించాడు.

ఈ విజయంతో డిఫెండింగ్ ఛాంపియన్‌గా ఉన్న భారత జట్టు, మార్చి 5న ముంబైలోని వాంఖడే స్టేడియంలో జరగనున్న రెండో సెమీఫైనల్‌లో ఇంగ్లండ్‌తో తలపడనుంది.