సూపర్ 8 పోరు: భారత్‌కు భారీ టార్గెట్ నిర్దేశించిన విండీస్

కోల్‌కతాలోని చారిత్రక ఈడెన్ గార్డెన్స్ వేదికగా జరుగుతున్న ఐసీసీ పురుషుల టీ20 వరల్డ్ కప్ 2026 సూపర్ 8 మ్యాచ్‌లో వెస్టిండీస్ జట్టు టీమిండియా ముందు భారీ లక్ష్యాన్ని నిర్దేశించింది. గ్రూప్-1లో భాగంగా జరుగుతున్న ఈ కీలక పోరులో టాస్ గెలిచిన భారత కెప్టెన్ తొలుత బౌలింగ్ ఎంచుకున్నాడు. అయితే బ్యాటింగ్‌కు దిగిన విండీస్ జట్టు నిర్ణీత 20 ఓవర్లలో 4 వికెట్ల నష్టానికి 195 పరుగుల భారీ స్కోరు సాధించింది. దీంతో భారత్ సెమీస్ రేసులో నిలవాలంటే 196 పరుగులు చేయాల్సి ఉంది.

ఇన్నింగ్స్ ఆరంభం నుంచే విండీస్ బ్యాటర్లు దూకుడుగా ఆడారు. ఓపెనర్ షాయ్ హోప్ 33 బంతుల్లో 32 పరుగులు చేసి ఇన్నింగ్స్‌ను నిలబెట్టగా, రోస్టన్ ఛేజ్ 25 బంతుల్లో 5 ఫోర్లు, ఒక సిక్సర్‌తో 40 పరుగులు చేసి స్కోరు బోర్డును పరుగులు పెట్టించాడు. షిమ్రాన్ హెట్‌మయర్ (12 బంతుల్లో 27) రెండు భారీ సిక్సర్లతో విరుచుకుపడ్డాడు. అయితే భారత బౌలర్ జస్ప్రీత్ బుమ్రా వేసిన 12వ ఓవర్ మ్యాచ్‌ను కాసేపు భారత్ వైపు తిప్పింది. ఆ ఓవర్‌లో బుమ్రా.. ప్రమాదకరమైన హెట్‌మయర్, క్రీజులో సెట్ అయిన రోస్టన్ ఛేజ్ ఇద్దరినీ పెవిలియన్‌కు పంపి డబుల్ ధమాకా ఇచ్చాడు. దీంతో 119 పరుగులకే 4 వికెట్లు కోల్పోయి విండీస్ కష్టాల్లో పడినట్లు కనిపించింది.

కానీ ఆఖర్లో సీన్ మారింది. రోవ్‌మన్ పావెల్, జేసన్ హోల్డర్ జోడి భారత బౌలర్లపై ఎదురుదాడికి దిగింది. వీరిద్దరూ ఐదో వికెట్‌కు అజేయంగా 76 పరుగుల భాగస్వామ్యాన్ని నెలకొల్పారు. జేసన్ హోల్డర్ కేవలం 22 బంతుల్లో 3 సిక్సర్లు, 2 ఫోర్లతో 37 పరుగులు చేయగా, పావెల్ 19 బంతుల్లో 34 పరుగులు చేసి నాటౌట్‌గా నిలిచాడు. ముఖ్యంగా చివరి ఓవర్లలో అర్ష్‌దీప్ సింగ్, హార్దిక్ పాండ్యా బౌలింగ్‌ను వీరు చితకబాదారు.

భారత బౌలర్లలో జస్ప్రీత్ బుమ్రా 4 ఓవర్లలో 36 పరుగులిచ్చి 2 కీలక వికెట్లు తీయగా, హార్దిక్ పాండ్యా, వరుణ్ చక్రవర్తి చెరో వికెట్ దక్కించుకున్నారు. అర్ష్‌దీప్ సింగ్ 4 ఓవర్లలో వికెట్లేమీ తీయకుండా 43 పరుగులు సమర్పించుకోవడం భారత్‌కు ఇబ్బందిగా మారింది. ఈడెన్ పిచ్ బ్యాటింగ్‌కు సహకరిస్తుండటంతో, ఛేజింగ్‌లో భారత బ్యాటర్లు ఏ మేరకు రాణిస్తారో వేచి చూడాలి.