అమరావతిలో హైకోర్టు గెస్ట్‌ హౌస్‌కు శంకుస్థాపన, జడ్జిల క్వార్టర్స్ ప్రారంభం.. హాజరైన సీజేఐ సూర్యకాంత్, సీఎం చంద్రబాబు

ఏపీ రాజధాని అమరావతిలో న్యాయ వ్యవస్థకు సంబంధించిన కీలక మౌలిక వసతుల కల్పన దిశగా మరో అడుగు పడింది. అమరావతిలో నూతనంగా నిర్మించనున్న ఏపీ హైకోర్టు అతిథి గృహానికి (గెస్ట్ హౌస్) శంకుస్థాపన, అలాగే హైకోర్టు న్యాయమూర్తుల కోసం నిర్మించిన నివాస సముదాయాల ప్రారంభోత్సవ కార్యక్రమాలు ఘనంగా జరిగాయి.

ఈ కార్యక్రమాల్లో సుప్రీంకోర్టు ప్రధాన న్యాయమూర్తి (సీజేఐ) జస్టిస్ సూర్యకాంత్, ఆంధ్రప్రదేశ్ ముఖ్యమంత్రి చంద్రబాబు ముఖ్య అతిథులుగా పాల్గొన్నారు. వీరితో పాటు ఏపీ హైకోర్టు ప్రధాన న్యాయమూర్తి జస్టిస్ ధీరజ్ సింగ్ ఠాకూర్ గారు, ఇతర గౌరవ హైకోర్టు న్యాయమూర్తులు ఈ వేడుకలో పాలుపంచుకున్నారు. జడ్జిల కోసం అత్యాధునిక సౌకర్యాలతో నిర్మించిన నివాస సముదాయాలను ఈ సందర్భంగా సీజేఐ ప్రారంభించారు. అనంతరం హైకోర్టు గెస్ట్ హౌస్ నిర్మాణ పనులకు భూమిపూజ చేశారు.

అంతకుముందు, సీజేఐ జస్టిస్ సూర్యకాంత్ గారు తిరుమల శ్రీవారిని దర్శించుకున్నారు. ఇవాళ ఉదయం స్వామివారి సేవలో పాల్గొన్న అనంతరం ఆయన అమరావతికి చేరుకున్నారు. అమరావతిలో ఆయనకు రాష్ట్ర ప్రభుత్వం మరియు హైకోర్టు వర్గాల నుండి ఘనస్వాగతం లభించింది. రాజధానిలో న్యాయమూర్తులకు అవసరమైన సౌకర్యాలను మెరుగుపరచడంలో భాగంగా ఈ నిర్మాణాలు చేపట్టినట్లు అధికారులు తెలిపారు.