ముంబైలో విదేశీ మహిళకు వేధింపులు... వీడియో వైరల్

ముంబైలో పర్యటిస్తున్న ఓ విదేశీ యువతికి వేధింపులు ఎదురయ్యాయి. తనకు ఎదురైన ఈ చేదు అనుభవాన్ని బాధితురాలే స్వయంగా వీడియో తీసి తన సోషల్ మీడియా ఖాతాలో పోస్ట్ చేయడంతో ఈ ఘటన వెలుగులోకి వచ్చింది. ఈ సంఘటనపై ముంబై పోలీసులు కేసు నమోదు చేసి దర్యాప్తు చేపట్టారు.

గత రెండు నెలలుగా తాను భారతదేశంలో పర్యటిస్తున్నానని, ఇక్కడి ప్రజలు ఎంతో దయతో, ఆప్యాయంగా పలకరించారని, అయితే ఈ ఒక్కరోజు మాత్రం అందుకు భిన్నంగా జరిగిందని బాధితురాలు తన పోస్ట్‌లో పేర్కొన్నారు. 

"మేము వద్దని చాలాసార్లు చెప్పినా, ఇద్దరు వ్యక్తులు మమ్మల్ని 15 నిమిషాలకు పైగా వెంబడించారు. ఫొటోలు కావాలంటూ తీవ్రంగా ఒత్తిడి చేశారు. దీంతో నాకు చాలా అసౌకర్యంగా అనిపించింది. ఒకానొక దశలో వారిని పక్కకు నెట్టేయాల్సి వచ్చింది. 'నో' అంటే కాదని అర్థం చేసుకోవాలి. మన భద్రత, సౌకర్యమే అన్నింటికంటే ముఖ్యం" అని ఆమె రాసుకొచ్చారు.

ఈ వీడియో వైరల్ కావడంతో ముంబై పోలీసులు స్పందించారు. అగ్రిపాడు పోలీస్ స్టేషన్‌లో ఇద్దరు గుర్తుతెలియని నిందితులపై భారతీయ న్యాయ సంహిత (బీఎన్ఎస్)లోని సెక్షన్ 78(1), 3(5) కింద కేసు (ఎఫ్ఐఆర్ నెం. 97/26) నమోదు చేశారు. నిందితులను గుర్తించి, అరెస్ట్ చేసేందుకు దర్యాప్తు కొనసాగుతోందని అధికారులు తెలిపారు.

విదేశీ పర్యాటకుల పట్ల ఇలాంటి ఘటనలు జరగడం ఇదే మొదటిసారి కాదు. గత ఏడాది డిసెంబర్ 10న గౌహతిలో జరిగిన ఓ సంగీత కచేరీలో తనను అసభ్యంగా తాకారని ఓ విదేశీ యువతి ఆరోపించారు. అలాగే, జూలై 31న ముంబైలోని గేట్‌వే ఆఫ్ ఇండియా వద్ద ఓ మహిళా టూరిస్ట్‌ను కొందరు వ్యక్తులు చుట్టుముట్టి, ఆమె అనుమతి లేకుండా బలవంతంగా సెల్ఫీలు తీసుకున్న వీడియో అప్పట్లో వైరల్ అయిన విషయం తెలిసిందే.