అది ఎఫ్– 16 ఫైటర్ జెట్ కాదట.. ఫేక్ వీడియో పోస్ట్ చేశారంటున్న 'గ్రోక్'!

ఆఫ్ఘనిస్థాన్, పాకిస్థాన్ సరిహద్దుల్లో యుద్ధ వాతావరణం నెలకొన్న వేళ సోషల్ మీడియా వేదికగా సాగుతున్న ప్రచార యుద్ధం కలకలం రేపుతోంది. పాకిస్థాన్‌కు చెందిన అత్యాధునిక ఎఫ్-16 యుద్ధ విమానాన్ని కూల్చివేసినట్లు తాలిబన్లు ఒక వీడియోను వైరల్ చేయగా.. అది తప్పుడు సమాచారమని తేలింది. ‘ఆఫ్ఘనిస్థాన్ డిఫెన్స్’ అనే అనధికారిక ఎక్స్ (ట్విట్టర్) ఖాతా పోస్ట్ చేసిన ఈ వీడియోను పరిశీలించిన ఎక్స్ ఏఐ ఇంజిన్ 'గ్రోక్'.. ఇది దుష్ప్రచారమేనని తేల్చిచెప్పింది.

వైరల్ గా మారిన వీడియో..

వైరల్ అవుతున్న వీడియోలో మంటల్లో కాలిపోతున్న విమానం తోక భాగంపై పాకిస్థాన్ జెండా, ‘85510’ అనే నంబర్లు కనిపిస్తున్నాయి. అయితే, ఆ విమానం పరిమాణం మరియు ఆకారం ఎఫ్-16 యుద్ధ విమానానికి ఏమాత్రం సరిపోలడం లేదని ఏఐ విశ్లేషణలో తేలింది. గతంలో ఎప్పుడో జరిగిన ప్రమాదానికి సంబంధించిన దృశ్యాలను లేదా సంబంధంలేని ఇతర విమానాల శకలాలను వాడుకుని, ప్రస్తుత యుద్ధ పరిస్థితుల్లో పాక్‌ను దెబ్బతీయడానికి ఈ ఫేక్ వీడియోను ప్రచారంలోకి తెచ్చినట్లు నిపుణులు భావిస్తున్నారు.