బాబర్ ఆజంకు ఘోర అవమానం.. జట్టులో ఉన్నా బ్యాటింగ్ ఇవ్వని పాక్ మేనేజ్‌మెంట్!

టీ20 ప్రపంచకప్‌లో పాకిస్థాన్ సూపర్-8 దశకు అర్హత సాధించినప్పటికీ, ఆ జట్టు స్టార్ బ్యాటర్ బాబర్ ఆజంకు తీవ్ర నిరాశ ఎదురైంది. నమీబియాతో బుధవారం జరిగిన మ్యాచ్‌లో తుది జట్టులో ఉన్నా, అతడికి బ్యాటింగ్ చేసే అవకాశం ఇవ్వకుండా టీమ్ మేనేజ్‌మెంట్ పక్కనపెట్టింది. ఈ ఘటన ఇప్పుడు క్రీడా వర్గాల్లో చర్చనీయాంశంగా మారింది.

ఈ మ్యాచ్‌లో పాకిస్థాన్ ఇన్నింగ్స్ సమయంలో నాలుగో స్థానంలో బాబర్ బ్యాటింగ్‌కు రావాల్సి ఉంది. కానీ, కెప్టెన్ సల్మాన్ అలీ ఆఘా అతడికి బదులుగా యువ ఆటగాడు ఖవాజా నాఫేను క్రీజులోకి పంపాడు. నాఫే (5) త్వరగానే ఔటైనప్పటికీ, ఆ తర్వాత కూడా బాబర్‌ను కాదని షాదాబ్ ఖాన్‌ను బ్యాటింగ్‌కు ప్రమోట్ చేశాడు. దీంతో ఇన్నింగ్స్ ముగిసేంతవరకు బాబర్ డగౌట్‌కే పరిమితమయ్యాడు.

గత కొంతకాలంగా ఫామ్ లేమితో ఇబ్బంది పడుతున్న బాబర్‌పై యాజమాన్యానికి నమ్మకం సన్నగిల్లడం వల్లే ఈ నిర్ణయం తీసుకున్నట్లు విశ్లేషకులు భావిస్తున్నారు. మరోవైపు, ఈ ఘటనపై సోషల్ మీడియాలో అభిమానులు తీవ్రంగా స్పందిస్తున్నారు. 'జట్టులో ఫీల్డింగ్ చేయడానికే బాబర్‌ను ఉంచారా?' అంటూ కొందరు వ్యంగ్యంగా ప్రశ్నిస్తుండగా, అతడిపై ఫన్నీ మీమ్స్, ట్రోల్స్ వెల్లువెత్తుతున్నాయి. ముఖ్యంగా, 'డిప్రెషన్‌లో ఉన్నాం' అంటూ బాబర్ వాయిస్‌తో ఎడిట్ చేసిన ఓ వీడియో వైరల్ అవుతోంది.

ఇక మ్యాచ్ విషయానికొస్తే, పాకిస్థాన్ 102 పరుగుల భారీ తేడాతో నమీబియాపై ఘన విజయం సాధించింది. ఓపెనర్ సాహిబ్‌జాదా ఫర్హాన్ (100 నాటౌట్) అజేయ సెంచరీతో చెలరేగగా, బౌలింగ్‌లో స్పిన్నర్ ఉస్మాన్ తారిక్ 4 వికెట్లు పడగొట్టి ప్రత్యర్థిని దెబ్బతీశాడు. ఈ విజయంతో పాక్ గ్రూప్-A నుంచి సూపర్-8 బెర్తును ఖరారు చేసుకుంది.