Shashank Bhupathi: వరంగల్ చరిత్రలో తొలిసారి.. నింగిలోకి 'రుద్రమ' రాకెట్!

వరంగల్ చరిత్రలో తొలిసారిగా ఒక మోడల్ రాకెట్‌ను ప్రయోగించేందుకు సన్నాహాలు జరుగుతున్నాయి. జాతీయ సైన్స్ దినోత్సవాన్ని పురస్కరించుకుని ఈ నెల 28న ఈ కార్యక్రమాన్ని నిర్వహించనున్నారు. ఇస్రో స్పేస్ ట్యూటర్, ఏటీడీఆర్ఎల్ (అనిసియంట్ టెక్నాలజీస్ డిజైన్ అండ్ రీసెర్చ్ ల్యాబ్) వ్యవస్థాపకుడు శశాంక్ భూపతి నేతృత్వంలో ఈ ప్రయోగానికి ఏర్పాట్లు చేస్తున్నారు. వరంగల్ నిట్, కాకతీయ పట్టణాభివృద్ధి సంస్థ (కుడా) ఈ కార్యక్రమానికి సహకారం అందిస్తున్నాయి.

'రుద్రమ' అని నామకరణం చేసిన ఈ మోడల్ రాకెట్‌ను ప్రయోగించడానికి ముందు, హనుమకొండలోని హయగ్రీవాచారి గ్రౌండ్‌లో సైన్స్, అంతరిక్షంపై అవగాహన సదస్సు నిర్వహిస్తారు. ఫిబ్రవరి 28న మధ్యాహ్నం 2 గంటల నుంచి సాయంత్రం 5 గంటల వరకు ఈ సదస్సు కొనసాగుతుంది. అనంతరం రాకెట్‌ను నింగిలోకి పంపిస్తారు.

దీంతో పాటు, అంతరిక్ష వీక్షణపై ఆసక్తిని పెంచేందుకు ప్రత్యేక కార్యక్రమాలను కూడా ఏర్పాటు చేశారు. ఈ నెల 15 నుంచి 27 వరకు ప్రతిరోజూ సాయంత్రం 6 గంటల నుంచి రాత్రి 11 గంటల వరకు భద్రకాళి ట్యాంక్‌బండ్‌పై టెలిస్కోపులతో నక్షత్ర వీక్షణ (స్టార్ గేజింగ్) కార్యక్రమం ఉంటుంది. ఈ కార్యక్రమాల్లో పాల్గొనేందుకు స్కూల్, కాలేజీ విద్యార్థులకు, ఆసక్తిగల వారికి ప్రవేశం ఉచితమని శశాంక్ తెలిపారు.