యువ జట్టు అద్భుతం.. ఆరోసారి ప్రపంచకప్ గెలిచిన టీమిండియాకు ప్రధాని మోదీ ప్రశంసలు

అండర్-19 ప్రపంచకప్‌లో భారత యువ జట్టు చారిత్రక విజయం సాధించడంపై ప్రధానమంత్రి నరేంద్ర మోదీ హర్షం వ్యక్తం చేశారు. జట్టు సభ్యులకు అభినందనలు తెలుపుతూ, ఈ విజయం ఎందరో యువ క్రీడాకారులకు స్ఫూర్తినిస్తుందని అన్నారు. "భారత క్రికెట్ ప్రతిభ మరోసారి ప్రకాశించింది. అండర్-19 ప్రపంచకప్ గెలిచిన మన యువ జట్టును చూసి గర్వపడుతున్నాను. టోర్నమెంట్ ఆసాంతం అసాధారణ నైపుణ్యాన్ని ప్రదర్శించారు" అని ప్రధాని 'ఎక్స్' వేదికగా పోస్ట్ చేశారు.

హరారే వేదికగా జరిగిన ఫైనల్లో ఇంగ్లండ్‌పై 100 పరుగుల భారీ తేడాతో టీమిండియా ఘన విజయం సాధించింది. తద్వారా రికార్డు స్థాయిలో ఆరోసారి అండర్-19 ప్రపంచకప్‌ను కైవసం చేసుకుంది. తొలుత బ్యాటింగ్ చేసిన భారత్, ఓపెనర్ వైభవ్ సూర్యవంశీ ఆకాశమే హద్దుగా చెలరేగడంతో నిర్ణీత ఓవర్లలో 9 వికెట్లకు 411 పరుగుల భారీ స్కోరు చేసింది. కేవలం 80 బంతుల్లో 15 ఫోర్లు, 15 సిక్సర్లతో సూర్యవంశీ 175 పరుగులు చేశాడు. కెప్టెన్ ఆయుష్ మాత్రే (53), కనిష్క్ చౌహాన్ (37) కూడా రాణించారు.

భారీ లక్ష్య ఛేదనలో ఇంగ్లండ్ కూడా దీటుగానే పోరాడింది. కాలెబ్ ఫాల్కనర్ (115) శతకంతో మెరిశాడు. అయితే, భారత బౌలర్లు కీలక సమయాల్లో వికెట్లు తీసి ఒత్తిడి పెంచారు. ఆర్ఎస్ అంబరీష్ 3 వికెట్లు పడగొట్టగా, దీపేష్ దేవేంద్రన్ 2 వికెట్లతో రాణించడంతో ఇంగ్లండ్ 311 పరుగులకే ఆలౌట్ అయింది.

ఈ చారిత్రక విజయంపై ఉపరాష్ట్రపతి సి.పి. రాధాకృష్ణన్, క్రికెట్ దిగ్గజం సచిన్ టెండూల్కర్, భారత కెప్టెన్ సూర్యకుమార్ యాదవ్ తదితరులు యువ జట్టుకు అభినందనలు తెలిపారు. ముఖ్యంగా 14 ఏళ్ల సూర్యవంశీ అద్భుత ప్రదర్శనను సచిన్ ప్రత్యేకంగా ప్రశంసించాడు.