బెన్ స్టోక్స్‌కు తప్పిన పెను ప్రమాదం.. ముఖానికి తీవ్ర‌ గాయాలతో స్టార్ ఆల్‌రౌండర్!

ఇంగ్లండ్ టెస్ట్ జట్టు కెప్టెన్, స్టార్ ఆల్‌రౌండర్ బెన్ స్టోక్స్ తీవ్రంగా గాయపడ్డాడు. ఓ ట్రైనింగ్ సెషన్‌లో బంతి వేగంగా వచ్చి అతడి ముఖానికి తగలడంతో ఈ ప్రమాదం జరిగింది. తన గాయపడిన ముఖం ఫొటోను స్టోక్స్ ఇన్‌స్టాగ్రామ్‌లో పోస్ట్ చేశాడు. వాచిపోయిన కుడి కన్ను, ముక్కుకి కట్టు, పెదవిపై గాయంతో ఉన్న ఫొటోను షేర్ చేస్తూ.. 'క్రికెట్ బంతి ఎలా ఉందో మీరు చూడాలి' అంటూ చమత్కరించాడు.

34 ఏళ్ల స్టోక్స్ ఇటీవల ఆస్ట్రేలియాతో జరిగిన యాషెస్ సిరీస్‌లో ఇంగ్లండ్‌కు నాయకత్వం వహించాడు. ఈ సిరీస్‌ను ఇంగ్లండ్ 1-4 తేడాతో కోల్పోయింది. సిడ్నీలో జరిగిన ఐదో టెస్టులో బౌలింగ్ చేస్తున్న‌ స్టోక్స్ కు గజ్జల్లో గాయమైంది. ప్రస్తుతం దాని నుంచి కోలుకుంటున్నాడు. ఈ గాయం నుంచి పూర్తిగా కోలుకోకముందే ఇప్పుడు ముఖానికి గాయం కావడం అభిమానులను ఆందోళనకు గురిచేస్తోంది.

త్వరలో అబుదాబిలో పాకిస్థాన్ షాహీన్స్‌తో జరగనున్న వైట్-బాల్ సిరీస్‌ కోసం ఇంగ్లండ్ లయన్స్ జట్టుకు కోచింగ్ సిబ్బందిలో చేరడానికి స్టోక్స్ సిద్ధమవుతున్నాడు. ఈ కోచింగ్ బృందంలో మాజీ ఆటగాళ్లు ఆండ్రూ ఫ్లింటాఫ్, మొయిన్ అలీ కూడా ఉన్నారు. ఈ నేపథ్యంలోనే స్టోక్స్ ప్రాక్టీస్ చేస్తుండగా ఈ ప్రమాదం జరిగింది. ప్రస్తుతం ఒకేసారి రెండు గాయాల నుంచి స్టోక్స్ కోలుకోవాల్సి ఉంది.