Gaddar: గద్దర్ పేరిట తెలంగాణ ఫిల్మ్ అవార్డులు.. రేపటి నుంచి చిత్రాల ప్రదర్శన

ప్రజా గాయకుడు, విప్లవకారుడు గద్దర్ స్మారకార్థం తెలంగాణ ప్రభుత్వం ప్రతిష్ఠాత్మకంగా 'తెలంగాణ గద్దర్ ఫిల్మ్ అవార్డ్స్'ను ఏర్పాటు చేయడం తెలిసిందే. తెలంగాణ ఫిల్మ్ డెవలప్‌మెంట్ కార్పొరేషన్ (టీఎఫ్‌డీసీ) ఆధ్వర్యంలో జరగనున్న ఈ అవార్డుల ప్రక్రియలో భాగంగా చిత్రాల ప్రదర్శన కార్యక్రమం రేపు (ఫిబ్రవరి 6) ప్రారంభం కానుంది.

హైదరాబాద్‌లోని బంజారాహిల్స్, రోడ్ నెం. 2లో ఉన్న ప్రసాద్ ఫిల్మ్ ల్యాబ్‌లో మధ్యాహ్నం 12 గంటలకు ఈ కార్యక్రమాన్ని లాంఛనంగా ప్రారంభిస్తారు. ఈ ప్రారంభోత్సవానికి ముఖ్య అతిథులుగా ఉప ముఖ్యమంత్రి భట్టి విక్రమార్క, రోడ్లు-భవనాలు, సినిమాటోగ్రఫీ శాఖ మంత్రి కోమటిరెడ్డి వెంకట్ రెడ్డి హాజరుకానున్నారు.

టీఎఫ్‌డీసీ ఛైర్మన్‌, ప్రముఖ నిర్మాత దిల్ రాజు సారథ్యంలో ఈ అవార్డుల వేడుక జరగనుంది. గద్దర్ పేరు మీద అవార్డులను అందించడం ద్వారా ఆయనకు ఘన నివాళి అర్పించాలని ప్రభుత్వం నిర్ణయించింది. ఈ చిత్రాల ప్రదర్శనతో అవార్డుల ఎంపిక ప్రక్రియ మొదలు కానుంది.