Sara Arjun: 'యుఫోరియా'లో ధురంధర్ భామ.. సారా అర్జున్!

బాలీవుడ్ నుంచి ఇప్పుడు ఏ ఇండస్ట్రీ వైపు దృష్టిపెట్టినా, అందరూ ఓ అందమైన అమ్మాయి గురించే మాట్లాడుకుంటున్నారు. చక్కని కనుముక్కుతీరున్న ఈ అమ్మాయిపై ఎన్ని కథలైనా .. కావ్యాలైన రాయొచ్చునని అనుకుంటున్నారు. 'పొన్నియిన్ సెల్వన్'లో ఐశ్వర్య రాయ్ కి టీనేజ్ పాత్ర చేసిన ఈ బ్యూటీ ఇప్పుడు మరింత అందంగా తయారైందే అంటూ ఆశ్చర్యపోతున్నారు.'ధురంధర్' సినిమా ద్వారా అందరి చూపును ఆకర్షించిన ఆ సుందరినే సారా అర్జున్.  
 
సారా అర్జున్ టాలీవుడ్ లో ఫలానా హీరోతో ఎంట్రీ ఇస్తే బాగుంటుందనే చర్చలు ఇక్కడ కొనసాగుతూనే ఉన్నాయి. అయితే ఊహించని విధంగా ఈ బ్యూటీని 'యుఫోరియా' సినిమాతో తెలుగు ప్రేక్షకుల ముందుకు గుణశేఖర్ తీసుకొస్తున్నారు. జానపద .. పౌరాణికాలను సమర్థవంతంగా తెరకెక్కించగల దర్శకుడిగా గుణశేఖర్ కి పేరుంది. ఎంతటి భారీ కథనైనా అందంగా తెరపై ఆవిష్కరించగలిగిన నేర్పు ఆయన సొంతం. ఆయన ఏ జోనర్ నుంచి ఏ కథను ఎంచుకున్నా, తనదైన ముద్ర కనిపిస్తుంది.

 అలాంటి గుణశేఖర్ నుంచి వస్తున్న తాజా చిత్రమే 'యుఫోరియా'. నీలిమా గుణ - యుక్తా గుణ ఈ సినిమాను నిర్మించగా, ఈ నెల 6వ తేదీన థియేటర్లకు రావడానికి ఈ సినిమా సిద్ధమవుతోంది. భూమిక - సారా అర్జున్ ప్రధానమైన పాత్రలను పోషించిన సినిమా ఇది. కీలకమైన పాత్రలో గౌతమ్ వాసుదేవ మీనన్ కనిపించనున్నారు. యూత్ ఎలా తప్పుదోవ పడుతుందనేది తాను చాలా బోల్డ్ గా చూపించాననీ, తప్పకుండా అందరినీ ఆలోచింపజేసేదిలా ఈ సినిమా ఉంటుందని గుణశేఖర్ అంటున్నారు. ఈ సినిమాతో టాలీవుడ్ వైపు నుంచి కూడా సారా అర్జున్ హిట్ అందుకుంటుందేమో చూడాలి మరి.