అక్షరాస్యత విషయంలో పాకిస్థాన్ చాలా వీక్!

దాయాది దేశం పాకిస్థాన్ తీవ్రమైన అక్షరాస్యత సంక్షోభాన్ని ఎదుర్కొంటోంది. దక్షిణాసియా దేశాల్లోకెల్లా అక్షరాస్యతలో పాకిస్థాన్ అట్టడుగున నిలిచింది. దేశంలో 10 సంవత్సరాలు లేదా అంతకంటే ఎక్కువ వయస్సు ఉన్న వారిలో కేవలం 63 శాతం మంది మాత్రమే చదవడం, రాయడం చేయగలరని ఓ తాజా నివేదిక వెల్లడించింది. స్థానిక మీడియా కథనాల ప్రకారం, 'ఫ్రీ అండ్ ఫెయిర్ ఎలక్షన్ నెట్‌వర్క్ (ఫాఫెన్)' అనే సంస్థ ఈ సమీక్షను నిర్వహించింది. పాకిస్థాన్ సోషల్ అండ్ లివింగ్ స్టాండర్డ్స్ మెజర్‌మెంట్ సర్వే (2024–25) అధికారిక డేటా ఆధారంగా ఈ నివేదికను రూపొందించారు.

గత ఆరేళ్లలో అక్షరాస్యత కేవలం 3 శాతం మాత్రమే పెరగడం ఆందోళన కలిగించే విషయమని విశ్లేషకులు పేర్కొంటున్నారు. 2018-19లో 60 శాతంగా ఉన్న అక్షరాస్యత, 2024-25 నాటికి 63 శాతానికి చేరింది. అంతేకాకుండా, స్త్రీ, పురుషుల మధ్య, ప్రావిన్సుల మధ్య కూడా అక్షరాస్యతలో భారీ వ్యత్యాసాలు ఉన్నాయి. పురుషుల్లో 73 శాతం అక్షరాస్యులు ఉండగా, మహిళల్లో ఈ సంఖ్య 54 శాతానికే పరిమితమైంది. బలూచిస్థాన్‌లో అత్యల్పంగా 49 శాతం అక్షరాస్యత నమోదైంది.

దేశంలో నెలకొన్న తీవ్ర ఆర్థిక సంక్షోభం ప్రజల విద్య, ఆహారంపై తీవ్ర ప్రభావం చూపుతోంది. ఆహారం, చదువుల కన్నా నివాసం, యుటిలిటీ బిల్లులకే కుటుంబాలు అధికంగా ఖర్చు చేయాల్సి వస్తోందని గ్యాలప్ పాకిస్థాన్ సర్వేలో తేలింది. ఫలితంగా, ప్రస్తుతం దేశంలో ప్రతి నలుగురిలో ఒకరు ఆహార అభద్రతతో బాధపడుతున్నారు.

పాకిస్థాన్ చరిత్రలోనే తొలిసారిగా విద్యపై ప్రభుత్వానికన్నా కుటుంబాలే అధికంగా ఖర్చు చేస్తున్నాయని 'ది న్యూస్ ఇంటర్నేషనల్' పత్రిక తన కథనంలో పేర్కొంది. మొత్తం విద్యా వ్యయంలో కుటుంబాల వాటా 2.8 ట్రిలియన్ పాకిస్థానీ రూపాయలు కాగా, ప్రభుత్వ వాటా 2.23 ట్రిలియన్లుగా ఉంది. ప్రభుత్వ విద్యపై నమ్మకం తగ్గడం, ప్రైవేట్ విద్య వైపు మొగ్గు చూపడంతో కుటుంబాలపై ఈ భారం పడుతోంది.