బడ్జెట్ వేళ 'నేత' రాజసం .. నిర్మలమ్మ తొమ్మిదేళ్ల ప్రయాణం!

కేంద్ర ఆర్థిక మంత్రి నిర్మలా సీతారామన్ ఆదివారం తన 9వ బడ్జెట్‌ను ప్రవేశపెట్టేందుకు పార్లమెంట్‌కు చేరుకున్నప్పుడు, ఆమె ధరించిన చీర మరోసారి చర్చనీయాంశమైంది. ఈ ఏడాది ఆమె తన సొంత రాష్ట్రమైన తమిళనాడుకు చెందిన చారిత్రక కాంజీవరం సిల్క్ చీరను ఎంచుకున్నారు. మెజెంటా/పర్పుల్ రంగులో ఉన్న ఈ చీరపై బంగారు రంగు 'కట్టం' (గళ్లు), కాఫీ బ్రౌన్ బోర్డర్‌పై చేసిన సున్నితమైన వర్క్ భారతీయ చేనేత కళా వైభవాన్ని చాటిచెప్పింది.

తొమ్మిదేళ్లుగా ఆమె ధరించిన చీరలు వివిధ రాష్ట్రాల వస్త్ర కళలకు బ్రాండ్ అంబాసిడర్‌లుగా నిలిచాయి.
      2025 (మధుబని): బీహార్‌కు చెందిన పద్మశ్రీ అవార్డు గ్రహీత దులారీ దేవి బహూకరించిన చేపల డిజైన్ ఉన్న మధుబని ఆర్ట్ చీరను ధరించారు.
   2024 (బెంగాలీ కాంతా): మధ్యంతర బడ్జెట్ వేళ పశ్చిమ బెంగాల్‌కు చెందిన నీలం రంగు టస్సర్ సిల్క్ 'కాంతా' వర్క్ చీరలో మెరిశారు.
      2023 (కసూతి): కర్ణాటకకు చెందిన ధార్వాడ్ కసూతి ఎంబ్రాయిడరీ మరియు ఇల్కల్ వీవ్ ఉన్న ఎరుపు రంగు చీరను ధరించారు.
      2022 (బొంకై): ఒడిశాకు చెందిన ప్రసిద్ధ 'బొంకై' హ్యాండ్లూమ్ చీరను ఎంచుకున్నారు.

   2021 (పోచంపల్లి): తెలంగాణకు చెందిన ఎరుపు మరియు క్రీమ్ రంగుల పోచంపల్లి ఇకత్ చీరను ధరించి మన తెలుగు నేతన్నల నైపుణ్యాన్ని ప్రపంచానికి చాటారు.
 2019 (మంగళగిరి): తన తొలి బడ్జెట్ ప్రసంగం కోసం ఆంధ్రప్రదేశ్‌లోని గుంటూరు జిల్లాకు చెందిన ప్రసిద్ధ మంగళగిరి పట్టు చీరను ధరించి సెంటిమెంట్‌ను చాటుకున్నారు.
కేవలం చీరలే కాదు, బడ్జెట్ పత్రాలను మోసుకెళ్లే విధానంలోనూ ఆమె మార్పు తెచ్చారు. గతంలో ఉన్న బ్రీఫ్‌కేస్ సంప్రదాయాన్ని పక్కన పెట్టి, ఎరుపు రంగు పట్టు వస్త్రంలో చుట్టిన 'బహీ ఖాతా' పద్ధతిని ప్రవేశపెట్టారు. ప్రస్తుతం ఆమె 'డిజిటల్ బడ్జెట్'ను ప్రవేశపెడుతున్నప్పటికీ, ఆ ట్యాబ్‌ను కూడా అదే సంప్రదాయ ఎరుపు రంగు బ్యాగ్‌లో తీసుకెళ్లడం విశేషం.