సెంచరీ హీరో ఇషాన్ కిషన్ సిక్సర్ల వర్షం... టీ20ల్లో భారత్ మూడో అత్యధిక స్కోరు

న్యూజిలాండ్‌తో జరుగుతున్న ఐదో, ఆఖరి టీ20 మ్యాచ్‌లో భారత జట్టు పరుగుల సునామీ సృష్టించింది. తిరువనంతపురం గ్రీన్‌ఫీల్డ్ స్టేడియం వేదికగా బ్యాటర్లు సిక్సర్ల వర్షం కురిపించడంతో, నిర్ణీత 20 ఓవర్లలో 5 వికెట్ల నష్టానికి 271 పరుగుల భారీ స్కోరు నమోదు చేసింది. యువ ఓపెనర్ ఇషాన్ కిషన్ (103) అద్భుత సెంచరీతో కదం తొక్కగా, కెప్టెన్ సూర్యకుమార్ యాదవ్ (63), హార్దిక్ పాండ్యా (42) మెరుపు ఇన్నింగ్స్‌లతో చెలరేగారు. అంతర్జాతీయ టీ20 క్రికెట్ చరిత్రలో టీమిండియాకు ఇది మూడో అత్యధిక స్కోరు కావడం విశేషం.

ఈ మ్యాచ్‌లో టాస్ గెలిచిన భారత కెప్టెన్ సూర్యకుమార్ యాదవ్ బ్యాటింగ్ ఎంచుకున్నాడు. అయితే, ఆరంభంలోనే టీమిండియాకు ఎదురుదెబ్బ తగిలింది. సంజూ శాంసన్ (6), అభిషేక్ శర్మ (30) స్వల్ప వ్యవధిలో ఔటవడంతో 48 పరుగులకే 2 వికెట్లు కోల్పోయింది. ఈ దశలో క్రీజులోకి వచ్చిన కెప్టెన్ సూర్యకుమార్ యాదవ్ తో కలిసి ఇషాన్ కిషన్‌ ఇన్నింగ్స్‌ను నిలబెట్టడమే కాకుండా, స్కోరు బోర్డును పరుగులు పెట్టించాడు. ఈ జోడీ కివీస్ బౌలర్లపై పూర్తి ఆధిపత్యం ప్రదర్శిస్తూ మూడో వికెట్‌కు కేవలం 57 బంతుల్లోనే 137 పరుగుల రికార్డు భాగస్వామ్యం నెలకొల్పింది.

ముఖ్యంగా ఇషాన్ కిషన్ ఆకాశమే హద్దుగా చెలరేగాడు. కేవలం 43 బంతుల్లో 6 ఫోర్లు, 10 భారీ సిక్సర్లతో 103 పరుగులు చేసి విధ్వంసం సృష్టించాడు. అతనికి తోడుగా సూర్యకుమార్ యాదవ్ 30 బంతుల్లో 4 ఫోర్లు, 6 సిక్సర్లతో 63 పరుగులు చేశాడు. వీరిద్దరూ ఔటైన తర్వాత, చివర్లో హార్దిక్ పాండ్యా కేవలం 17 బంతుల్లోనే 1 ఫోర్, 4 సిక్సర్లతో 42 పరుగులు చేసి స్కోరును 270 దాటించాడు. రింకూ సింగ్ (8*), శివమ్ దూబే (7*) నాటౌట్‌గా నిలిచారు.

న్యూజిలాండ్ బౌలర్లలో లాకీ ఫెర్గూసన్ రెండు వికెట్లు తీసినప్పటికీ 41 పరుగులు సమర్పించుకున్నాడు. కెప్టెన్ మిచెల్ శాంట్నర్ తన 4 ఓవర్లలో 60 పరుగులు, కైల్ జేమీసన్ 59 పరుగులు ఇవ్వడంతో కివీస్ బౌలింగ్ విభాగం పూర్తిగా తేలిపోయింది.