నా జర్నీలో ఎంతో ఆనందాన్నిచ్చిన చిత్రం.. 'హ్యాపీ'పై బన్నీ భావోద్వేగ పోస్ట్!

ఐకాన్ స్టార్ అల్లు అర్జున్ కెరీర్‌లో ప్రత్యేకంగా నిలిచిన 'హ్యాపీ' చిత్రం విడుదలై నేటితో 20 ఏళ్లు పూర్తయింది. 2006 జనవరి 27న విడుదలైన ఈ సినిమా రెండు దశాబ్దాల మైలురాయిని చేరుకున్న సందర్భంగా అల్లు అర్జున్ సోషల్ మీడియా వేదికగా ఓ భావోద్వేగ పోస్ట్‌ను పంచుకున్నారు. తన సినీ ప్రయాణంలో అత్యంత సంతోషాన్నిచ్చిన చిత్రాలలో 'హ్యాపీ' ఒకటని ఆయన గుర్తుచేసుకున్నారు.

ఈ సందర్భంగా చిత్ర దర్శకుడు ఎ. కరుణాకరన్‌కు, తన సహనటి జెనీలియాకు, విలక్షణ నటుడు మనోజ్ బాజ్‌పాయ్‌కు ప్రత్యేక ధన్యవాదాలు తెలిపారు. అద్భుతమైన సంగీతంతో సినిమాకు ప్రాణం పోసిన యువన్ శంకర్ రాజాను, ఇతర సాంకేతిక నిపుణులను ఆయన ప్రశంసించారు. అలాగే, ఈ చిత్రాన్ని నిర్మించిన తన తండ్రి అల్లు అరవింద్‌కు, గీతా ఆర్ట్స్ సంస్థకు కృతజ్ఞతలు తెలియజేశారు.

ఎ. కరుణాకరన్ దర్శకత్వంలో వచ్చిన ఈ రొమాంటిక్ కామెడీ ఎంటర్‌టైనర్ అప్పట్లో మంచి విజయాన్ని సాధించింది. తెలుగులోనే కాకుండా మలయాళంలో కూడా 'హ్యాపీ' ఘన విజయం సాధించి, అక్కడ అల్లు అర్జున్‌కు బలమైన అభిమాన గణాన్ని సంపాదించి పెట్టింది.