పనిమనిషిపై పదేళ్లుగా అత్యాచారం.. దురంధర్ నటుడి అరెస్టు

బాలీవుడ్ నటుడు నదీమ్ ఖాన్‌ను అత్యాచారం కేసులో ముంబై పోలీసులు అరెస్ట్ చేశారు. తన ఇంట్లో పనిచేసే 41 ఏళ్ల మహిళపై పదేళ్లుగా లైంగిక దాడికి పాల్పడినట్టు ఆయనపై ఆరోపణలు నమోదయ్యాయి. పెళ్లి చేసుకుంటానని నమ్మించి, ఈ దారుణానికి ఒడిగట్టారని బాధితురాలు తన ఫిర్యాదులో పేర్కొంది. ఇటీవలే రణ్‌వీర్ సింగ్ నటించిన ‘దురంధర్’ సినిమాలో నదీమ్ ఖాన్ ఒక పాత్రలో కనిపించారు.

వివరాల్లోకి వెళితే, బాధితురాలు పలువురు నటుల ఇళ్లలో పనిచేస్తుండగా కొన్ని సంవత్సరాల క్రితం నదీమ్ ఖాన్‌తో పరిచయం ఏర్పడింది. పెళ్లి చేసుకుంటానని నమ్మించడంతో వీరి మధ్య సంబంధం కొనసాగింది. ఈ క్రమంలో మాల్వానీలోని తన నివాసంలో, వెర్సోవాలోని నదీమ్ ఖాన్ ఇంట్లో పలుమార్లు తనపై అత్యాచారం చేశాడని బాధితురాలు ఆరోపించింది. అయితే, ఇటీవల నదీమ్ ఖాన్ పెళ్లికి నిరాకరించడంతో ఆమె పోలీసులను ఆశ్రయించింది.

బాధితురాలి ఫిర్యాదు మేరకు మొదట వెర్సోవా పోలీసులు జీరో ఎఫ్‌ఐఆర్ నమోదు చేశారు. అనంతరం, మొదటి ఘటన జరిగిన ప్రాంతం మాల్వానీ పోలీస్ స్టేషన్ పరిధిలో ఉండటంతో కేసును అక్కడికి బదిలీ చేశారు. కేసును విచారించిన మాల్వానీ పోలీసులు జనవరి 22న నదీమ్ ఖాన్‌ను అరెస్ట్ చేశారు. ఈ విషయాన్ని సోమవారం పోలీసులు మీడియాకు వెల్లడించారు. ప్రస్తుతం నదీమ్ ఖాన్ పోలీస్ కస్టడీలో ఉండగా, దర్యాప్తు కొనసాగుతోంది.