వరల్డ్ కప్ నుంచి బంగ్లాదేశ్‌ను తప్పించడంపై పాకిస్థాన్ ఫైర్

ప్రపంచకప్ ఆరంభానికి ముందే క్రికెట్ ప్రపంచంలో ఓ కొత్త వివాదం రాజుకుంది. టోర్నమెంట్ నుంచి బంగ్లాదేశ్‌ను తప్పించి, ఆ స్థానంలో స్కాట్లాండ్‌కు అవకాశం కల్పిస్తూ అంతర్జాతీయ క్రికెట్ కౌన్సిల్ (ఐసీసీ) తీసుకున్న నిర్ణయంపై పాకిస్థాన్ క్రికెట్ బోర్డు (పీసీబీ) చైర్మన్ మొహ్సిన్ నఖ్వీ తీవ్ర ఆగ్రహం వ్యక్తం చేశారు. ఇది బంగ్లాదేశ్‌కు జరిగిన అన్యాయమని, ఐసీసీ ద్వంద్వ ప్రమాణాలు పాటించకూడదని ఆయన వ్యాఖ్యానించారు.

భద్రతా కారణాల దృష్ట్యా భారత్‌లో మ్యాచ్‌లు ఆడేందుకు బంగ్లాదేశ్ క్రికెట్ బోర్డు నిరాకరించింది. తమ మ్యాచ్‌లను శ్రీలంకకు తరలించాలని ఐసీసీని కోరింది. అయితే, ఈ అభ్యర్థనను ఐసీసీ తిరస్కరించి, భారత్‌లోనే ఆడాలని స్పష్టం చేసింది. దీనికి బంగ్లాదేశ్ అంగీకరించకపోవడంతో, ర్యాంకింగ్స్ ఆధారంగా ఆ జట్టు స్థానాన్ని స్కాట్లాండ్‌తో భర్తీ చేస్తున్నట్లు ప్రకటించింది.

ఈ నిర్ణయంపై మొహ్సిన్ నఖ్వీ తీవ్రంగా స్పందించారు. "బంగ్లాదేశ్‌కు అన్యాయం జరిగింది. ఐసీసీ బోర్డు సమావేశంలో నేను ఇదే విషయాన్ని స్పష్టంగా చెప్పాను. ఐసీసీ ద్వంద్వ ప్రమాణాలను పాటించకూడదు. బంగ్లాదేశ్ క్రికెట్‌లో కీలక భాగస్వామి, వారికి అన్యాయం చేయకూడదు" అని ఆయన అన్నారు. బంగ్లాదేశ్‌ను తిరిగి టోర్నీలోకి తీసుకోవాలని ఆయన డిమాండ్ చేశారు.

ఇదే సమయంలో, టీ20 ప్రపంచకప్‌లో పాకిస్థాన్ పాల్గొనే అంశంపై తమ ప్రభుత్వమే తుది నిర్ణయం తీసుకుంటుందని నఖ్వీ స్పష్టం చేశారు. పాకిస్థాన్ మ్యాచ్‌లు శ్రీలంకలో జరగనున్నప్పటికీ, బంగ్లాదేశ్‌కు మద్దతుగా టోర్నీ నుంచి పాక్ తప్పుకునే అవకాశాలు ఉన్నాయని ఆయన పరోక్షంగా సంకేతాలు ఇచ్చారు. ఈ వివాదంపై ఐసీసీ బోర్డులో చర్చ జరగ్గా, బంగ్లాదేశ్‌కు న్యాయం జరగాలని పాకిస్థాన్ గట్టిగా పట్టుబడుతోంది.