మున్ముందు ఏం జరుగుతుందో మాకు తెలియదు: బంగ్లాదేశ్ క్రికెటర్ షొరిఫుల్ ఇస్లాం

త్వరలో జరగనున్న టీ20 ప్రపంచ కప్‌లో బంగ్లాదేశ్ పాల్గొంటుందా లేదా అనే విషయంపై ఆ దేశ ఫాస్ట్ బౌలర్ షొరిఫుల్ ఇస్లాం స్పందించాడు. ప్రపంచ కప్‌కు వెళ్లాలా వద్దా అనేది తమ చేతుల్లో లేదని, ఆటగాళ్లుగా తమ పని ప్రదర్శనపై దృష్టి పెట్టడమేనని స్పష్టం చేశాడు.

భారత్‌తో దెబ్బతింటున్న సంబంధాల నేపథ్యంలో భద్రతా కారణాలను చూపుతూ, తమ జట్టును భారత్‌కు పంపేది లేదని బంగ్లాదేశ్ క్రికెట్ బోర్డు (బీసీబీ) తేల్చిచెప్పింది. తమ మ్యాచ్‌లను శ్రీలంకకు మార్చాలని డిమాండ్ చేసింది. అయితే, ఈ ప్రతిపాదనను ఐసీసీ తిరస్కరించింది. షెడ్యూల్ ప్రకారమే భారత్‌లో మ్యాచ్‌లు జరుగుతాయని బుధవారం స్పష్టం చేసింది. ఈ నేపథ్యంలో బంగ్లాదేశ్ టోర్నీకి దూరమయ్యే అవకాశాలున్నాయనే ఊహాగానాలు మొదలయ్యాయి.

ఈ వివాదంపై బంగ్లాదేశ్ ప్రీమియర్ లీగ్ (బీపీఎల్)లో 'ప్లేయర్ ఆఫ్ ది సీజన్' అవార్డు అందుకున్న అనంతరం షొరిఫుల్ మీడియాతో మాట్లాడాడు. "ఆటగాళ్లుగా, మేం ఎలా మెరుగ్గా రాణించాలనే దానిపైనే ఆలోచిస్తాం. ప్రపంచ కప్‌కు వెళ్లడం, వెళ్లకపోవడం అనేది మా చేతుల్లో లేదు. మా క్రికెట్ పెద్దలు తీసుకున్న నిర్ణయాన్ని మేం గౌరవిస్తాం. మా నియంత్రణలో లేని విషయం గురించి ఎక్కువగా మాట్లాడటంలో అర్థం లేదు" అని వివరించాడు.

ఈ విషయం జట్టులో చర్చకు వచ్చిందా, ఆటగాళ్లపై మానసికంగా ప్రభావం చూపుతోందా అని అడగగా.. "మున్ముందు ఏం జరుగుతుందో మాకు తెలియదు. దాని గురించి ఆలోచించడం కంటే మా ఆటపై దృష్టి పెట్టడం మంచిది" అని షొరిఫుల్ బదులిచ్చాడు. ఇటీవలే ముగిసిన బీపీఎల్‌లో చట్టోగ్రామ్ రాయల్స్ తరఫున ఆడిన ఈ లెఫ్ట్ ఆర్మ్ పేసర్, 26 వికెట్లతో అద్భుత ప్రదర్శన కనబరిచాడు.