ఏనుగు పిల్లకు పుట్టినరోజు వేడుక.. నెటిజన్ల హృదయాలను గెలుచుకున్న యానిమల్ లవర్!

జంతువులపై ప్రేమను చాటుకోవడంలో ఒక్కొక్కరిది ఒక్కో శైలి. కొందరు వాటికి ఆహారం పెడితే, మరికొందరు వాటిని కుటుంబ సభ్యుల్లా చూసుకుంటారు. అసోంకు చెందిన బిపిన్ కశ్యప్ అనే జంతు ప్రేమికుడు ఒక అడుగు ముందుకేసి, తాను పెంచుకుంటున్న ఏనుగు పిల్ల పుట్టినరోజును ఘనంగా జరిపాడు. ప్రియాన్షి అలియాస్ 'మోమో'  అని పిలుచుకునే ఈ ఏనుగు పిల్ల బర్త్‌డే వేడుకకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది.

బిపిన్ కశ్యప్ తన ఇన్‌స్టాగ్రామ్ ఖాతాలో ఈ వీడియోను పంచుకున్నారు. ఈ వీడియోలో ఆయన ఎంతో ఆనందంగా ప్రియాన్షి కోసం పుట్టినరోజు పాట పాడుతూ కనిపించారు. ఆ మూగజీవిపై ఆయన చూపిస్తున్న ప్రేమ, ఆప్యాయత నెటిజన్ల హృదయాలను కదిలించింది. ప్రియాన్షి కోసం ప్రత్యేకంగా పండ్లు, ధాన్యాలతో అలంకరించిన నీలి రంగు కేక్‌ను కూడా ఈ వీడియోలో చూడవచ్చు. పుట్టినరోజు మెనూలో భాగంగా అరటిపండ్లు, యాపిల్స్, ద్రాక్ష, కూరగాయలు వంటి ఆరోగ్యకరమైన ఆహారాన్ని సిద్ధం చేశారు. బిపిన్, ప్రియాన్షి మధ్య ఉన్న బలమైన అనుబంధానికి ఈ వేడుక అద్దం పడుతోంది.

ఈ వీడియోపై సోషల్ మీడియా యూజర్లు ప్రశంసల వర్షం కురిపిస్తున్నారు. ఏనుగు పిల్ల క్యూట్‌నెస్‌కు చాలామంది ఫిదా అవుతున్నారు. ఒక యూజర్ స్పందిస్తూ, "జంతువులను ప్రేమించే, వాటి పట్ల సానుభూతి చూపించే వారంటే నాకు చాలా ఇష్టం. మోమోకు పుట్టినరోజు శుభాకాంక్షలు" అని కామెంట్ చేశాడు. "ఇన్‌స్టాగ్రామ్‌లోనే అత్యంత అందమైన దృశ్యం ఇది" అని మరో యూజర్ పేర్కొన్నాడు. "ఈ జీవాలను ప్రేమిస్తున్నందుకు లవ్ యూ బ్రదర్. దేవుడు నిన్ను చల్లగా చూడాలి" అని ఇంకొకరు రాశారు. "పిల్ల ప్రియాన్షికి నా ప్రేమంతా.. తల్లి, పిల్ల ఇద్దరూ నిండు నూరేళ్లు జీవించాలి" అని మరో నెటిజన్ ఆకాంక్షించాడు.