ఉజ్జయినిలో మత ఘర్షణలు.. వాహనాలకు నిప్పు, రాళ్ల దాడులు

మధ్యప్రదేశ్‌లోని ఉజ్జయిని జిల్లాలో తీవ్ర ఉద్రిక్తత చోటుచేసుకుంది. విశ్వ హిందూ పరిషత్ (వీహెచ్‌పీ) స్థానిక నేతపై దాడి జరగడంతో రెండు వర్గాల మధ్య ఘర్షణలు చెలరేగాయి. ఈ హింసాత్మక ఘటనల్లో దుండగులు వాహనాలకు నిప్పుపెట్టడంతో పాటు రాళ్ల దాడులకు పాల్పడ్డారు. పరిస్థితిని అదుపులోకి తెచ్చేందుకు పోలీసులు పట్టణంలో సెక్షన్ 144 విధించారు.

ఉజ్జయిని జిల్లా తరానా పట్టణంలో వీహెచ్‌పీ గో సంరక్షణ విభాగం స్థానిక నేత సోహల్ ఠాకూర్ బుందేలాపై గురువారం సాయంత్రం కొందరు వ్యక్తులు దాడి చేశారు. ఒకరినొకరు చూసుకోవడంపై మొదలైన చిన్న వాగ్వాదం ఈ దాడికి దారితీసిందని పోలీసులు తెలిపారు. ఈ ఘటనలో సోహల్ తలకు గాయాలయ్యాయి.

ఈ దాడి విషయం తెలియడంతో పట్టణంలో హింస చెలరేగింది. ఇరువర్గాలు ఒకరిపై ఒకరు రాళ్లు రువ్వుకున్నాయి. కొందరు దుండగులు స్థానిక బస్ స్టాండ్‌లో ఉన్న వాహనాలకు నిప్పుపెట్టారు. ఈ అల్లర్లలో ఒక బస్సు పూర్తిగా దగ్ధం కాగా, మరో 11 బస్సులు సహా రెండు డజన్లకు పైగా వాహనాలు ధ్వంసమయ్యాయి.

వెంటనే రంగంలోకి దిగిన పోలీసులు పరిస్థితిని అదుపులోకి తెచ్చేందుకు 300 మంది సిబ్బందిని మోహరించారు. సోహల్ ఠాకూర్‌పై దాడి ఘటనలో ఆరుగురిపై హత్యాయత్నం కేసు నమోదు చేసి, ఐదుగురిని అరెస్ట్ చేశారు. పరారీలో ఉన్న మరో నిందితుడి కోసం గాలిస్తున్నారు. మధ్యప్రదేశ్ ముఖ్యమంత్రి మోహన్ యాదవ్ సొంత జిల్లాలోనే ఈ ఘర్షణలు జరగడం గమనార్హం. ప్రస్తుతం తరానాలో భారీ బందోబస్తు ఏర్పాటు చేసి, డ్రోన్లతో నిఘా కొనసాగిస్తున్నారు.