పెట్ కేర్ మార్కెట్‌లో కీలక ముందడుగు... చేతులు కలిపిన వియాష్ సైంటిఫిక్ లిమిటెడ్, బోహ్రింగర్

దేశీయ ఫార్మా రంగంలో మరో కీలక భాగస్వామ్యం కుదిరింది. వియాష్ సైంటిఫిక్ లిమిటెడ్ అనుబంధ సంస్థ అయిన అలివిరా యానిమల్ హెల్త్ లిమిటెడ్, ప్రముఖ సంస్థ బోహ్రింగర్ ఇంగెల్‌హైమ్ ఇండియా ప్రైవేట్ లిమిటెడ్‌తో వ్యూహాత్మక ఒప్పందం చేసుకుంది. ఈ ఒప్పందంలో భాగంగా, భారత్‌లో బోహ్రింగర్ ఇంగెల్‌హైమ్ యొక్క పెంపుడు జంతువుల (కంపాషన్ యానిమల్) ఆరోగ్య సంరక్షణ ఉత్పత్తులను అలివిరా పంపిణీ చేయడంతో పాటు ప్రమోట్ చేయనుంది.

దేశంలో పెంపుడు జంతువులను పెంచుకునే వారి సంఖ్య పెరగడం, వాటి ఆరోగ్య సంరక్షణపై అవగాహన అధికం కావడంతో పెట్ హెల్త్ కేర్ మార్కెట్ వేగంగా వృద్ధి చెందుతోంది. ఈ అవకాశాలను అందిపుచ్చుకునే లక్ష్యంతో ఈ రెండు సంస్థలు చేతులు కలిపాయి.

ఈ ఒప్పందంపై వియాష్ సైంటిఫిక్ ఎండీ, గ్రూప్ సీఈఓ డాక్టర్ హరిబాబు బోడేపూడి మాట్లాడుతూ.. "పెంపుడు జంతువుల విభాగంలో కీలక సంస్థగా మారాలన్న మా ప్రయాణంలో ఇది ఒక ముఖ్యమైన మైలురాయి. పట్టణ, గ్రామీణ ప్రాంతాల్లోని పెంపుడు జంతువులకు నాణ్యమైన వైద్య పరిష్కారాలు అందించడమే ఈ భాగస్వామ్యం యొక్క ప్రధాన ఉద్దేశం" అని తెలిపారు. అలివిరాకు ఉన్న విస్తృత నెట్‌వర్క్‌తో, బోహ్రింగర్ ఉత్పత్తులను దేశవ్యాప్తంగా పెంపుడు జంతువుల యజమానులకు, వెటర్నరీ వైద్యులకు సులభంగా అందుబాటులోకి తీసుకురాగలమని ఆయన వివరించారు.

బోహ్రింగర్ ఇంగెల్‌హైమ్ ఇండియా యానిమల్ హెల్త్ కంట్రీ హెడ్ డాక్టర్ వినోద్ గోపాల్ మాట్లాడుతూ.. "భారత్‌లో మా దీర్ఘకాలిక వృద్ధి వ్యూహంలో ఈ భాగస్వామ్యం కీలకం. అలివిరా సహకారంతో పట్టణ, గ్రామీణ ప్రాంతాల్లో మా మార్కెట్ పరిధిని మరింత విస్తరించగలుగుతాం. నాణ్యమైన ఉత్పత్తులను అందిస్తూ, వినియోగదారులకు మెరుగైన సేవలు అందించడానికి ఈ ఒప్పందం దోహదపడుతుంది" అని అన్నారు.