కివీస్ తో మొదటి టీ20... టాస్ ఓడిన టీమిండియా

భారత్, న్యూజిలాండ్ జట్ల మధ్య టీ20 సిరీస్‌కు తెరలేచింది. నాగ్‌పూర్‌లోని విదర్భ క్రికెట్ అసోసియేషన్ స్టేడియం వేదికగా జరుగుతున్న తొలి టీ20 మ్యాచ్‌లో న్యూజిలాండ్ టాస్ గెలిచి బౌలింగ్ ఎంచుకుంది. దీంతో సూర్యకుమార్ యాదవ్ సారథ్యంలోని భారత జట్టు మొదట బ్యాటింగ్ చేస్తోంది.

సంజూ శాంసన్, అభిషేక్ శర్మ ఓపెనర్లుగా టీమిండియా ఇన్నింగ్స్‌ను ప్రారంభించారు. న్యూజిలాండ్ బౌలర్ జాకబ్ డఫీ వేసిన తొలి ఓవర్లోనే యువ బ్యాటర్ అభిషేక్ శర్మ ఒక భారీ సిక్సర్ బాదాడు. ఈ ఓవర్లో ఒక వైడ్, ఒక లెగ్ బై రూపంలో అదనపు పరుగులు కూడా వచ్చాయి. దీంతో తొలి ఓవర్ ముగిసేసరికి భారత్ వికెట్ నష్టపోకుండా 8 పరుగులు చేసింది. క్రీజులో అభిషేక్ శర్మ 6 పరుగులతో, సంజూ శాంసన్ పరుగులేమీ చేయకుండా ఉన్నారు.

న్యూజిలాండ్ భారత పర్యటనలో భాగంగా ఈ సిరీస్ జరుగుతోంది. కివీస్ జట్టుకు మిచెల్ శాంట్నర్ నాయకత్వం వహిస్తున్నాడు. ఇరు జట్లు తొలి మ్యాచ్‌లో గెలిచి సిరీస్‌లో బోణీ కొట్టాలని పట్టుదలగా ఉన్నాయి.

ఇటీవలే ముగిసిన వన్డే సిరీస్ ను టీమిండియా 1-2 తేడాతో న్యూజిలాండ్ కు కోల్పోయిన సంగతి తెలిసిందే. ఈ నేపథ్యంలో, ఐదు మ్యాచ్ ల టీ20 సిరీస్ ఫలితం ఎలా ఉండబోతోందన్న దానిపై ఆసక్తి నెలకొంది.