టీ20 వరల్డ్ కప్: బంగ్లాదేశ్ జట్టుకు మద్దతుగా పాకిస్థాన్ సంచలన నిర్ణయం

వచ్చే నెలలో భారత్, శ్రీలంక సంయుక్తంగా ఆతిథ్యమిస్తున్న ఐసీసీ టీ20 ప్రపంచకప్‌కు ముందు పెద్ద వివాదం రాజుకుంది. భారత్‌లో తమ మ్యాచ్‌ల వేదికను మార్చాలన్న బంగ్లాదేశ్ డిమాండ్‌కు మద్దతుగా పాకిస్థాన్ సంచలన నిర్ణయం తీసుకుంది. టోర్నీ కోసం తమ జట్టు సన్నాహకాలను తక్షణమే నిలిపివేస్తున్నట్లు ప్రకటించింది. ఒకవేళ బంగ్లాదేశ్ అభ్యర్థనను ఐసీసీ అంగీకరించకపోతే, టోర్నీ నుంచి తప్పుకోవడానికీ వెనుకాడబోమని పాకిస్థాన్ హెచ్చరించింది.

భద్రతా కారణాల దృష్ట్యా తమ మ్యాచ్‌లను భారత్ నుంచి శ్రీలంకకు తరలించాలని బంగ్లాదేశ్ క్రికెట్ బోర్డు (BCB) డిమాండ్ చేస్తోంది. అయితే, బంగ్లాదేశ్ ఫాస్ట్ బౌలర్ ముస్తాఫిజుర్ రెహ్మాన్‌ ఐపీఎల్ 2026 కాంట్రాక్ట్‌ను రద్దు చేయాలని కోల్‌కతా నైట్ రైడర్స్‌ను బీసీసీఐ కోరడమే ఈ వివాదానికి అసలు కారణంగా తెలుస్తోంది. ఈ నేపథ్యంలోనే బంగ్లాదేశ్ బోర్డు ఈ నిర్ణయం తీసుకున్నట్లు సమాచారం.

ఈ అంశంలో బంగ్లాదేశ్‌కు పాకిస్థాన్ పూర్తి మద్దతు ప్రకటించింది. పాకిస్థాన్ క్రికెట్ బోర్డు (PCB) ఛైర్మన్, ఆ దేశ అంతర్గత వ్యవహారాల మంత్రి కూడా అయిన మొహ్సిన్ నఖ్వీ.. బంగ్లా ప్రభుత్వంతో చర్చలు జరిపినట్లు మీడియా కథనాలు పేర్కొన్నాయి. బంగ్లా డిమాండ్లు నెరవేరకపోతే, తాము కూడా టోర్నీలో పాల్గొనడంపై పునరాలోచిస్తామని ఆయన స్పష్టం చేసినట్లు తెలుస్తోంది. అంతేకాకుండా, శ్రీలంకలో సాధ్యం కాకపోతే బంగ్లా మ్యాచ్‌లకు తామే ఆతిథ్యం ఇస్తామని కూడా పీసీబీ ప్రతిపాదించింది.

అయితే, సరైన కారణం లేకుండా టోర్నీ నుంచి తప్పుకుంటే ఐసీసీ నిబంధనల ప్రకారం పీసీబీ సుమారు 2 మిలియన్ డాలర్ల జరిమానా ఎదుర్కోవాల్సి వస్తుంది. మరోవైపు, బీసీబీ వైఖరిపై ఐసీసీ అసంతృప్తితో ఉన్నట్లు తెలుస్తోంది. బంగ్లాదేశ్‌కు భారత్‌లో ఎలాంటి భద్రతాపరమైన ముప్పు లేదని బీసీబీ తమకు హామీ ఇచ్చిందని ఐసీసీ వర్గాలు చెబుతున్నాయి. ఒకవేళ బంగ్లా తప్పుకుంటే, వారి స్థానంలో ర్యాంకింగ్స్ ప్రకారం స్కాట్లాండ్‌ను తీసుకుంటామని ఐసీసీ స్పష్టం చేసినట్లు సమాచారం. ఈ నెల 21న బంగ్లాదేశ్ అభ్యర్థనపై ఐసీసీ తుది నిర్ణయం తీసుకోనుంది.