మీలాంటి పక్షపాతిని చూడలేదు: ఏఆర్ రెహమాన్‌పై కంగనా ఫైర్

బాలీవుడ్‌లో మతపరమైన వివక్ష ఉందంటూ ఆస్కార్ విజేత, ప్రముఖ సంగీత దర్శకుడు ఏఆర్ రెహమాన్ చేసిన వ్యాఖ్యలు దుమారం రేపుతుండగా, ఈ వివాదంలోకి నటి, ఎంపీ కంగనా రనౌత్ ప్రవేశించారు. రెహమాన్‌పై ఆమె తీవ్ర స్థాయిలో విమర్శలు గుప్పించారు. రెహమాన్‌ ఒక ద్వేషపూరిత, పక్షపాత వ్యక్తి అని, గతంలో ఆయన తనను కలవడానికి కూడా నిరాకరించారని సంచలన ఆరోపణలు చేశారు.

ఇటీవల బీబీసీకి ఇచ్చిన ఇంటర్వ్యూలో ఏఆర్ రెహమాన్ మాట్లాడుతూ, గత ఎనిమిదేళ్లలో హిందీ చిత్ర పరిశ్రమలో ఒక 'పెద్ద మార్పు' జరిగిందని, ఇది మతపరమైన అంశం (కమ్యూనల్ థింగ్) కావచ్చని అభిప్రాయపడ్డారు. దీనివల్లే తనకు బాలీవుడ్‌లో పని తగ్గిందని, ఈ విషయం తనకు పరోక్షంగా తెలిసిందని పేర్కొన్నారు. ఈ వ్యాఖ్యలపై ఇప్పటికే శోభా డే, షాన్, జావేద్ అఖ్తర్ వంటి ప్రముఖులు స్పందించగా, ఇప్పుడు కంగనా ఘాటుగా బదులిచ్చారు.

ఈ విషయంపై తన ఇన్‌స్టాగ్రామ్ స్టోరీలో కంగనా ఒక సుదీర్ఘ పోస్ట్ పెట్టారు. "ప్రియమైన ఏఆర్ రెహమాన్ గారూ, నేను కాషాయ పార్టీ (బీజేపీ)కి మద్దతు ఇస్తున్నందుకు ఇండస్ట్రీలో ఎన్నో వివక్షలు, పక్షపాతాలు ఎదుర్కొంటున్నాను. కానీ నా జీవితంలో మీలాంటి ద్వేషపూరిత, పక్షపాత వైఖరి ఉన్న వ్యక్తిని ఎప్పుడూ చూడలేదు" అని ఆమె తీవ్రంగా విమర్శించారు.

తాను దర్శకత్వం వహించిన 'ఎమర్జెన్సీ' చిత్రానికి సంగీతం అందించమని రెహమాన్‌ను సంప్రదించానని, అయితే ఆయన కనీసం కథ వినడానికి కూడా ఇష్టపడలేదని కంగనా ఆరోపించారు. "నేను మీకు కథ చెప్పాలనుకున్నాను. కానీ కథ చెప్పడం అటుంచి, నన్ను కలవడానికే మీరు నిరాకరించారు. అది ఒక వర్గానికి సంబంధించిన 'ప్రచార చిత్రం' అని భావించి, అందులో భాగం కావడానికి మీరు ఇష్టపడలేదని నాకు తెలిసింది" అని ఆమె పేర్కొన్నారు.

అయితే, తన 'ఎమర్జెన్సీ' చిత్రాన్ని విమర్శకులు ఒక 'మాస్టర్‌పీస్' అని ప్రశంసించారని, సమతుల్య దృక్పథంతో ఉందని ప్రతిపక్ష నేతలు కూడా మెచ్చుకున్నారని కంగనా తెలిపారు. "కానీ మీరు ద్వేషంతో అంధులయ్యారు. మిమ్మల్ని చూస్తే జాలిగా ఉంది" అంటూ తన పోస్ట్‌ను ముగించారు. కంగనా చేసిన ఈ వ్యక్తిగత ఆరోపణలతో బాలీవుడ్‌లో పక్షపాతం, రాజకీయాలపై జరుగుతున్న చర్చ మరింత తీవ్రరూపం దాల్చింది.