సచిన్‌ను విస్మరించిన మార్క్ వా.. సరదాగా ఫోన్ చేసినట్టు నటించిన ఇంగ్లండ్ మాజీ క్రికెటర్.. అస‌లేం జ‌రిగిందంటే..!

ఆస్ట్రేలియా మాజీ ఆట‌గాడు మార్క్ వా ఎంపిక చేసిన ఆల్-టైమ్ XI జట్టు క్రికెట్ వర్గాల్లో చర్చనీయాంశంగా మారింది. మాస్ట‌ర్ బ్లాస్ట‌ర్‌ సచిన్ టెండూల్కర్‌కు ఆ జట్టులో చోటు కల్పించకపోవడమే ఇందుకు కారణం. ‘స్టిక్ టు క్రికెట్’ అనే ఓ కార్యక్రమంలో ఇంగ్లండ్ మాజీ ఆటగాళ్లు డేవిడ్ లాయిడ్, మైఖేల్ వాన్, అలిస్టర్ కుక్‌లతో కలిసి మార్క్ వా తన జట్టును ప్రకటించాడు.

ఈ జాబితాలో సచిన్ పేరు లేకపోవడాన్ని గమనించిన మైఖేల్ వాన్, ఈ విషయం సచిన్‌కు ఫోన్ చేసి చెప్పాలని డేవిడ్ లాయిడ్‌ను సరదాగా కోరాడు. వెంటనే లాయిడ్ ఫోన్ అందుకుని, తన ముద్దుపేరైన ‘బంబుల్’ అని పరిచయం చేసుకుంటూ సచిన్‌కు కాల్ చేసినట్లు నటించాడు. కాసేపటికే ‘అతను ఫోన్ పెట్టేశాడు’ అని చెప్పడంతో అక్కడ నవ్వులు విరిశాయి. ఈ సరదా సంభాషణతో కూడిన వీడియో ఇప్పుడు వైరల్‌గా మారింది.

కాగా, సచిన్ టెండూల్కర్ 1989 నుంచి 2013 వరకు తన అద్భుతమైన బ్యాటింగ్‌తో ప్రపంచవ్యాప్తంగా కోట్లాది మంది అభిమానులను సంపాదించుకున్నాడు. అంతర్జాతీయ క్రికెట్‌లో 100 సెంచరీలు సాధించిన ఏకైక ఆటగాడిగా, అత్యధిక పరుగులు (34,357) చేసిన వీరుడిగా రికార్డులు సృష్టించాడు. వన్డేల్లో తొలి డబుల్ సెంచరీ, 200 టెస్టులు ఆడిన ఘనత కూడా సచిన్‌దే. 2011లో ప్రపంచకప్ గెలిచిన భారత జట్టులో ఈ లెజెండ్ కూడా సభ్యుడు. ఇలాంటి మహోన్నత క్రికెటర్ ను మార్క్ వా తన జట్టులోకి తీసుకోకపోవడం ప్రస్తుతం క్రికెట్ అభిమానుల్లో ఆసక్తికరమైన చర్చకు దారితీసింది.