లాభాలతో ముగిసిన సూచీలు... ఐటీ, బ్యాంకింగ్ షేర్ల జోరు

దేశీయ స్టాక్ మార్కెట్లు శుక్రవారం స్వల్ప లాభాలతో ముగిశాయి. వారాంతంలో సానుకూల సంకేతాలతో సూచీలు లాభపడినప్పటికీ, ఇంట్రాడేలో తీవ్ర ఒడిదొడుకులను ఎదుర్కొన్నాయి. ట్రేడింగ్ ముగిసే సమయానికి, సెన్సెక్స్ 187 పాయింట్లు లాభపడి 83,570 వద్ద స్థిరపడింది. నిఫ్టీ 28 పాయింట్లు పెరిగి 25,694 వద్ద ముగిసింది.

ఈరోజు ఉదయం నిఫ్టీ 25,696 వద్ద ఫ్లాట్‌గా ప్రారంభమైంది. డిసెంబర్ త్రైమాసికంలో ఐటీ కంపెనీల ఫలితాలు అంచనాలను మించి రావడం, టెక్నాలజీపై వ్యయాలు పెరుగుతాయన్న అంచనాలతో ఐటీ షేర్లలో బలమైన ర్యాలీ కనిపించింది. దీంతో నిఫ్టీ ఇంట్రాడేలో 25,873 గరిష్ఠ స్థాయికి చేరింది. అయితే, అధిక స్థాయిల వద్ద మదుపరులు లాభాల స్వీకరణకు మొగ్గు చూపడంతో సూచీలు 25,662 కనిష్ఠ స్థాయికి పడిపోయి, చివరికి స్వల్ప లాభాలతో సరిపెట్టుకున్నాయి.

రంగాల వారీగా చూస్తే, నిఫ్టీ ఐటీ ఇండెక్స్ 3.34 శాతం మేర దూసుకెళ్లి టాప్ గెయినర్‌గా నిలిచింది. మెరుగైన ఆస్తుల నాణ్యత, మార్జిన్ల అంచనాలతో బ్యాంకింగ్ షేర్లలోనూ కొనుగోళ్ల మద్దతు లభించింది. నిఫ్టీ బ్యాంక్ ఇండెక్స్ 0.84 శాతం పెరిగి 60,082కి చేరి, కొత్త రికార్డు స్థాయికి చేరువైంది. మరోవైపు, ఫార్మా, కన్జ్యూమర్ డ్యూరబుల్స్ రంగాలు వరుసగా 1.30 శాతం, 1.15 శాతం మేర నష్టపోయాయి. మిడ్‌క్యాప్, స్మాల్‌క్యాప్ సూచీలు కూడా స్వల్పంగా నష్టపోయాయి.

కంపెనీల త్రైమాసిక ఫలితాలు ఆశాజనకంగా ఉంటే స్టాక్ ఆధారిత కదలికలు ఉండొచ్చని, అయితే సమీప భవిష్యత్తులో విదేశీ సంస్థాగత పెట్టుబడిదారుల అమ్మకాలు కొనసాగవచ్చని విశ్లేషకులు అంచనా వేస్తున్నారు.