బడ్జెట్ ఆ రోజే... తేదీపై క్లారిటీ ఇచ్చిన స్పీకర్ ఓం బిర్లా

కేంద్ర బడ్జెట్ 2026-27 సమర్పణ తేదీపై నెలకొన్న సందిగ్ధతకు తెరపడింది. ఫిబ్రవరి 1, ఆదివారం రోజే బడ్జెట్‌ను ప్రవేశపెట్టనున్నట్లు లోక్‌సభ స్పీకర్ ఓం బిర్లా సోమవారం ధృవీకరించారు. ఓ విలేకరుల సమావేశంలో అడిగిన ప్రశ్నకు సమాధానంగా ఆయన ఈ విషయాన్ని స్పష్టం చేశారు.

ఫిబ్రవరి 1, ఆదివారం ఉదయం 11 గంటలకు ఆర్థిక మంత్రి నిర్మలా సీతారామన్ లోక్‌సభలో బడ్జెట్‌ను ప్రవేశపెడతారని స్పీకర్ తెలిపారు. సాధారణంగా బడ్జెట్ ప్రవేశపెట్టే ఫిబ్రవరి 1వ తేదీ ఈసారి ఆదివారం కావడంతో తేదీలో ఏమైనా మార్పు ఉంటుందా అనే ఊహాగానాలు వినిపించాయి. తాజాగా స్పీకర్ ప్రకటనతో ఈ గందరగోళం తొలగిపోయింది.

పార్లమెంట్ బడ్జెట్ సమావేశాలు జనవరి 28న ప్రారంభమై ఏప్రిల్ 2 వరకు కొనసాగుతాయని పార్లమెంటరీ వ్యవహారాల మంత్రి కిరణ్ రిజిజు వెల్లడించారు. రాష్ట్రపతి ద్రౌపది ముర్ము ఉభయ సభలను సమావేశాలకు ఆహ్వానించినట్లు ఆయన పేర్కొన్నారు.

ఈ సమావేశాలు రెండు విడతలుగా జరగనున్నాయి. తొలి విడత జనవరి 28 నుంచి ఫిబ్రవరి 13 వరకు, రెండో విడత మార్చి 9 నుంచి ఏప్రిల్ 2 వరకు ఉంటుంది. బీటింగ్ రిట్రీట్ కార్యక్రమం కారణంగా జనవరి 29న, శనివారం కావడంతో జనవరి 31న పార్లమెంట్ సమావేశం కాదు. జనవరి 30న ఆర్థిక సర్వేను సభలో ప్రవేశపెట్టే అవకాశం ఉంది. 

రాష్ట్రపతి ప్రసంగానికి ధన్యవాద తీర్మానం, బడ్జెట్‌పై చర్చల అనంతరం ఫిబ్రవరి 13న సభకు విరామం ప్రకటిస్తారు. ఏప్రిల్ 3న గుడ్ ఫ్రైడే ఉండటంతో సమావేశాలు ఒక రోజు ముందే ముగియవచ్చని తెలుస్తోంది.