భారత బౌలింగ్‌ విభాగానికి దొరికిన ఆణిముత్యం అతడు: సంజయ్ మంజ్రేకర్

న్యూజిలాండ్‌తో వన్డే సిరీస్ నేపథ్యంలో, భారత మాజీ క్రికెటర్ సంజయ్ మంజ్రేకర్ యువ ఫాస్ట్ బౌలర్ హర్షిత్ రాణాపై ప్రశంసల వర్షం కురిపించాడు. భారత బౌలింగ్ దళానికి హర్షిత్ ఒక 'గొప్ప ఆవిష్కరణ' అని అభివర్ణించాడు. అతని రాకతో భారత బౌలింగ్ లైనప్ కు ఓ రూపం వచ్చిందని వ్యాఖ్యానించాడు.

జియోహాట్‌స్టార్ ప్రీ-మ్యాచ్ షోలో మంజ్రేకర్ మాట్లాడుతూ.. హర్షిత్ రాణా ఇన్నింగ్స్‌లోని అన్ని దశల్లోనూ బౌలింగ్ చేయగల సామర్థ్యం కలిగి ఉన్నాడని కొనియాడాడు. "అతను ఆటలోని అన్ని ఫేజ్‌లలో బౌలింగ్ చేయగలడు" అని పేర్కొన్నాడు. దక్షిణాఫ్రికాతో జరిగిన మ్యాచ్‌లో కొత్త బంతితో అనుభవజ్ఞులైన బ్యాటర్లను ఇబ్బంది పెట్టాడని, అలాగే మిడిల్ ఓవర్లలో తన టీ20 నైపుణ్యాలతో దూకుడుగా ఆడే బ్యాటర్లను ఔట్ చేశాడని గుర్తు చేశాడు.

గత కొంతకాలంగా మిడిల్ ఓవర్లలో వికెట్లు తీయడంలో భారత ఫాస్ట్ బౌలర్లు ఎదుర్కొంటున్న లోటును హర్షిత్ రాణా సమర్థవంతంగా భర్తీ చేస్తున్నాడని మంజ్రేకర్ విశ్లేషించాడు. అతని చేరికతో జట్టు బౌలింగ్ విభాగం మరింత పటిష్టంగా మారిందని అభిప్రాయపడ్డారు.