అయోధ్యలో కఠిన నిబంధనలు.. నాన్-వెజ్ ఫుడ్ డెలివరీపై నిషేధం

రామ మందిరానికి 15 కిలోమీటర్ల పరిధిలో మాంసాహార (నాన్-వెజ్) పదార్థాల ఆన్‌లైన్ డెలివరీని అయోధ్య యంత్రాంగం నిషేధించింది. ఈ మేరకు తాజాగా కఠినమైన ఉత్తర్వులు జారీ చేసింది. పవిత్ర పుణ్యక్షేత్రంగా భావించే 'పంచకోశి పరిక్రమ' పరిధిలోని ప్రాంతాల్లోకి ఆన్‌లైన్ ఫుడ్ డెలివరీ సంస్థలు మాంసాహారాన్ని సరఫరా చేస్తున్నాయని పదేపదే ఫిర్యాదులు రావడంతో అధికారులు ఈ నిర్ణయం తీసుకున్నారు.

అయోధ్యలోని కొన్ని హోటళ్లు, హోమ్‌స్టేలు అతిథులకు మాంసాహారంతో పాటు మద్యం కూడా అందిస్తున్నట్లు తమ దృష్టికి వచ్చిందని, ఇలాంటి చర్యలకు పాల్పడవద్దని వాటి యాజమాన్యాలకు హెచ్చరికలు జారీ చేశామని అధికారులు తెలిపారు. నిషేధం ఉన్నప్పటికీ ఆన్‌లైన్ ప్లాట్‌ఫామ్‌ల ద్వారా పర్యాటకులకు నాన్-వెజ్ ఫుడ్ అందుతోందని ఫిర్యాదులు వచ్చినట్లు అసిస్టెంట్ ఫుడ్ కమిషనర్ మాణిక్ చంద్ర సింగ్ ధ్రువీకరించారు.

"ఈ ఫిర్యాదుల నేపథ్యంలోనే ఆన్‌లైన్ నాన్-వెజ్ ఫుడ్ డెలివరీపై నిషేధం విధించాం. హోటళ్లు, దుకాణదారులు, డెలివరీ కంపెనీలన్నింటికీ సమాచారం ఇచ్చాం. నిబంధనలు కచ్చితంగా అమలయ్యేలా నిరంతర పర్యవేక్షణ ఉంటుంది" అని ఆయన స్పష్టం చేశారు.

అయోధ్య, ఫైజాబాద్‌లను కలిపే 14 కిలోమీటర్ల రామ్ పథ్ మార్గంలో మద్యం, మాంసం అమ్మకాలను నిషేధిస్తూ 2025 మే నెలలో అయోధ్య మున్సిపల్ కార్పొరేషన్ నిర్ణయం తీసుకుంది. మాంసం దుకాణాలను తొలగించినప్పటికీ, మద్యం అమ్మకాలపై నిషేధం మాత్రం తొమ్మిది నెలలుగా సరిగా అమలు కావడం లేదని, ఈ మార్గంలో రెండు డజన్లకు పైగా మద్యం దుకాణాలు ఇంకా నడుస్తున్నాయని స్థానికులు చెబుతున్నారు. అయితే, మద్యం దుకాణాలపై చర్యలు తీసుకోవాలంటే జిల్లా యంత్రాంగం అనుమతి తప్పనిసరి అని ఓ మున్సిపల్ అధికారి పేర్కొన్నారు.