హిమాచల్ బస్సు ప్రమాదంపై ప్రధాని మోదీ దిగ్భ్రాంతి... పరిహారం ప్రకటన

హిమాచల్ ప్రదేశ్‌లోని సిర్మౌర్ జిల్లాలో జరిగిన ఘోర బస్సు ప్రమాదంపై ప్రధానమంత్రి నరేంద్ర మోదీ తీవ్ర దిగ్భ్రాంతి వ్యక్తం చేశారు. ఈ దురదృష్టకర ఘటనలో ప్రాణాలు కోల్పోవడం అత్యంత విచారకరమని అన్నారు. మృతుల కుటుంబాలకు ఆయన ప్రగాఢ సానుభూతిని తెలియజేశారు. గాయపడిన వారు త్వరగా కోలుకోవాలని ప్రార్థిస్తున్నట్లు సోషల్ మీడియా వేదికగా పేర్కొన్నారు. ప్రమాదంలో మరణించిన వారి కుటుంబాలకు ప్రధానమంత్రి జాతీయ సహాయ నిధి (పీఎంఎన్ఆర్ఎఫ్) నుంచి రూ. 2 లక్షల చొప్పున, గాయపడిన వారికి రూ. 50,000 చొప్పున పరిహారం అందిస్తామని ప్రకటించారు.

శుక్రవారం సిర్మౌర్ జిల్లాలోని హరిపుర్‌ధార్ సమీపంలో 50 మందికి పైగా ప్రయాణికులతో వెళుతున్న ఓ ప్రైవేట్ బస్సు అదుపుతప్పి లోతైన లోయలో పడిపోయింది. ఈ ప్రమాదంలో 12 మంది మృతి చెందగా, పలువురు తీవ్రంగా గాయపడ్డారు. మృతుల సంఖ్య పెరిగే అవకాశం ఉందని అధికారులు తెలిపారు. సహాయక చర్యలు కొనసాగుతున్నాయి.

ఈ ఘటనపై కాంగ్రెస్ నాయకురాలు ప్రియాంక గాంధీ వాద్రా, కేంద్ర మంత్రి జేపీ నడ్డా, ముఖ్యమంత్రి సుఖ్విందర్ సింగ్ సుఖు, మాజీ కేంద్ర మంత్రి అనురాగ్ ఠాకూర్ తదితరులు కూడా తీవ్ర విచారం వ్యక్తం చేశారు. బాధితులకు అండగా నిలవాలని, అవసరమైన సహాయం అందించాలని వారు పిలుపునిచ్చారు.

సిమ్లా నుంచి కుప్వి వెళుతుండగా ఈ ప్రమాదం జరిగింది. ప్రమాదానికి గల కారణాలు ఇంకా తెలియరాలేదని పోలీసులు తెలిపారు. బస్సు నుజ్జునుజ్జు కావడంతో సహాయక చర్యలు కష్టతరంగా మారాయి. అధికారులు చేరుకోకముందే స్థానికులు రంగంలోకి దిగి సహాయక చర్యలు చేపట్టారు. క్షతగాత్రులను సమీపంలోని ఆసుపత్రికి తరలించారు. బాధితులకు మెరుగైన వైద్యం అందించాలని, మృతుల కుటుంబాలను ఆదుకోవాలని సీఎం సుఖు జిల్లా యంత్రాంగాన్ని ఆదేశించారు.