అరుదైన రికార్డు సమం చేసిన ఆసీస్ పేసర్ మిచెల్ స్టార్క్

ఆస్ట్రేలియా స్టార్ ఫాస్ట్ బౌలర్ మిచెల్ స్టార్క్ తన కెరీర్‌లో మరో అరుదైన మైలురాయిని అందుకున్నాడు. టెస్ట్ క్రికెట్ చరిత్రలో అత్యధిక వికెట్లు పడగొట్టిన ఎడమచేతివాటం బౌలర్‌గా చరిత్ర పుటల్లో తన పేరును లిఖించుకున్నాడు. సిడ్నీ వేదికగా జరిగిన యాషెస్ సిరీస్ చివరి టెస్టులో ఈ అరుదైన ఘనతను సాధించాడు. ఈ క్రమంలో శ్రీలంక స్పిన్ దిగ్గజం రంగనా హెరాత్ పేరిట ఉన్న రికార్డును స్టార్క్ సమం చేశాడు. ప్రస్తుతం వీరిద్దరూ 433 టెస్ట్ వికెట్లతో సంయుక్తంగా అగ్రస్థానంలో కొనసాగుతున్నారు. సుదీర్ఘ ఫార్మాట్‌లో ఒక లెఫ్ట్ ఆర్మ్ బౌలర్ సాధించిన అత్యధిక వికెట్లు ఇవే కావడం విశేషం.

అయితే, ఈ మైలురాయిని అందుకోవడంలో రంగనా హెరాత్ కంటే స్టార్క్‌కు ఎక్కువ మ్యాచ్‌లు అవసరమయ్యాయి. హెరాత్ కేవలం 93 టెస్టుల్లోనే ఈ ఫీట్ సాధించగా, స్టార్క్ 105వ మ్యాచ్‌లో ఈ మార్కును చేరుకున్నాడు. 

తాజాగా ఇంగ్లండ్ తో యాషెస్ సిరీస్‌లో మిచెల్ స్టార్క్ అసాధారణ ప్రదర్శనతో ఆకట్టుకున్నాడు. బంతితో నిప్పులు చెరగడమే కాకుండా, బ్యాట్‌తోనూ కీలక పరుగులు సాధించాడు. సిరీస్ మొత్తం మీద 31 వికెట్లు పడగొట్టి ఇంగ్లండ్ బ్యాటింగ్ ఆర్డర్‌ను ముప్పుతిప్పలు పెట్టాడు. దీంతో పాటు రెండు కీలకమైన హాఫ్ సెంచరీలు కూడా నమోదు చేశాడు. ఈ ఆల్‌రౌండ్ ప్రదర్శనకు గాను అతనికి 'ప్లేయర్ ఆఫ్ ది సిరీస్' అవార్డు లభించింది. 

కీలక పేసర్లు ప్యాట్ కమిన్స్, జోష్ హేజిల్‌వుడ్ అందుబాటులో లేని క్లిష్ట సమయంలో, ఆసీస్ బౌలింగ్ దళానికి నాయకత్వం వహించి ఒంటిచేత్తో జట్టును నడిపించాడు.

సుదీర్ఘ ఫార్మాట్‌పై మరింత దృష్టి సారించి, తన టెస్ట్ కెరీర్‌ను పొడిగించుకునే ఉద్దేశంతో స్టార్క్ ఇటీవలే అంతర్జాతీయ టీ20 ఫార్మాట్‌కు రిటైర్మెంట్ ప్రకటించాడు. అయితే, ఐపీఎల్, బిగ్ బాష్ లీగ్ వంటి ఫ్రాంచైజీ టీ20 టోర్నమెంట్లలో కొనసాగుతానని స్పష్టం చేశాడు. రాబోయే ఐపీఎల్ 2026 సీజన్‌లో అతను ఢిల్లీ క్యాపిటల్స్ జట్టు తరఫున బరిలోకి దిగనున్నాడు.