యువ భారత్ చేతిలో దక్షిణాఫ్రికా చిత్తు.. ప్లేయర్ ఆఫ్ ది సిరీస్ వైభవ్ సూర్యవంశీ

బెనోనిలోని విల్లోమూర్ పార్కులో జరిగిన అండర్-19 మూడవ మరియు చివరి యూత్ వన్డేలో భారత్ 233 పరుగుల భారీ తేడాతో ఘన విజయం సాధించింది. దీంతో యువ భారత్ 3-0 తేడాతో మూడు వన్డేల సిరీస్‌ను క్లీన్ స్వీప్ చేసింది. తొలుత బ్యాటింగ్ చేసిన భారత్ నిర్ణీత 50 ఓవర్లలో ఏడు వికెట్ల నష్టానికి 393 పరుగులు చేసింది. భారీ లక్ష్య ఛేదనలో దక్షిణాఫ్రికా యువజట్టు విఫలమైంది. 35 ఓవర్లలో 160 పరుగులకే కుప్పకూలింది.

కెప్టెన్ వైభవ్ సూర్యవంశీ 74 బంతుల్లో 9 ఫోర్లు, 10 సిక్సర్లతో 127 పరుగులతో చెలరేగడంతో పాటు బౌలింగ్‌లో కూడా ఒక వికెట్ పడగొట్టాడు. ఆరోన్ జార్జి 106 బంతుల్లో 16 ఫోర్లతో 118 పరుగులు చేసి రాణించాడు. దక్షిణాఫ్రికా టాప్ 4 బ్యాటర్లలో ఒక్కరు కూడా రెండంకెల స్కోరు చేయలేకపోయారు.

పాల్ జేమ్స్ (41), డేనియల్ బోస్మాన్ (40), కార్న్ బోథా (30 నాటౌట్) మాత్రమే చెప్పుకోదగిన పరుగులు చేశారు. భారత బౌలర్లలో కిషన్ కుమార్ సింగ్ 3 వికెట్లు, మహమ్మద్ ఎనాన్ 2 వికెట్లు పడగొట్టగా, హెనిల్ పటేల్, కనిష్క్ చౌహాన్, ఉదవ్ మోహన్, అంబరీష్, సూర్యవంశీ ఒక్కో వికెట్ తీశారు. వైభవ్ సూర్యవంశీ ప్లేయర్ ఆఫ్ ది మ్యాచ్‌తో పాటు ప్లేయర్ ఆఫ్ ది సిరీస్ అవార్డును కూడా గెలుచుకున్నాడు.