Champion movie: ఈ వారం విడుదలైన సినిమాల రేటింగ్స్ ఇవే!

ఈ ఏడాదిలో పెద్ద సినిమాల జోరు తక్కువేనని చెప్పాలి. థియేటర్ల దగ్గర చిన్న సినిమాల సందడి ఎక్కువగా కనిపిస్తూ వచ్చింది. ఏడాది చివరికి చేరుకుంటూ ఉండగా, ఈ వారంలో కూడా థియేటర్ల దగ్గర చిన్న సినిమాల హడావిడినే కనిపించింది. ఆ సినిమాల జాబితాలో ఛాంపియన్ .. శంబాల .. దండోరా .. ఈషా వంటి సినిమాలు ఉన్నాయి. ఈ మూడింటిలో కాస్త ఎక్కువ బడ్జెట్ లో రూపొందిన సినిమాగా 'ఛాంపియన్' కనిపిస్తుంది. రోషన్ - అనశ్వర రాజన్ జంటగా నటించిన సినిమా ఇది. 

స్వప్న సినిమా బ్యానర్ పై నిర్మితమైన ఈ సినిమాకి, ప్రదీప్ అద్వైతం దర్శకత్వం వహించాడు. రోషన్ - అనశ్వర జోడీగా కొత్తగా అనిపించడం .. రెండు పాటలు జనంలోకి వెళ్లడం వలన ఈ సినిమాపై బజ్ ఏర్పడింది. రజాకార్ల కాలంలో నడిచే ఈ కథకి, చాలా సైట్లు 2.5 నుంచి 3 వరకూ రేటింగ్ ఇచ్చాయి. ఆ తరువాత స్థానంలో నిలిచిన సినిమాగా 'శంబాల' కనిపిస్తుంది. ఆది సాయికుమార్ .. అర్చన అయ్యర్ .. శ్వాసిక విజయ్ ప్రధానమైన పాత్రలను పోషించిన ఈ సినిమాకి చాలా సైట్లు 2.5 రేటింగును ఇచ్చాయి. 

ఇక పెద్దగా పబ్లిసిటీ లేకపోయినా 'ఈషా' కూడా థియేటర్ల దగ్గర సందడి చేసింది. హారర్ థ్రిల్లర్ కంటెంట్ పట్ల ఆసక్తిని చూపించిన ప్రేక్షకుల సంఖ్య ఎక్కవగానే కనిపించింది. హెబ్బా పటేల్ - అఖిల్ రాజ్ ప్రధానమైన పాత్రలను పోషించిన ఈ సినిమా కూడా ఎక్కువ సైట్ల నుంచి 2.5 రేటింగ్ నే తెచ్చుకుంది. శివాజీ - నవదీప్ నటించిన 'దండోరా' కూడా ఎక్కువగా 2.5 .. 2.75 రేటింగ్ నే నమోదు చేసింది. విలేజ్ నేపథ్యంతో కూడిన ఈ సినిమా, ఎమోషన్స్ వైపు నుంచి ఎక్కువగా కనెక్ట్ అయింది.