ధురంధర్' హిట్‌తో ఫామ్‌లోకి రణవీర్... దీపికా ఇష్యూపై పాత వీడియో వైరల్

బాలీవుడ్ స్టార్ రణవీర్ సింగ్ 'ధురంధర్' చిత్రంతో భారీ విజయాన్ని అందుకున్నారు. ఈ నెల 5న విడుదలైన ఈ చిత్రం బాక్సాఫీస్ వద్ద కలెక్షన్ల వర్షం కురిపిస్తోంది. ఇప్పటికే రూ. 350 కోట్లకు పైగా వసూళ్లు సాధించి, బాలీవుడ్‌లో 'పుష్ప 2' పేరిట ఉన్న కొన్ని రికార్డులను సైతం అధిగమించింది.  

గత కొన్నాళ్లుగా సరైన హిట్ లేక ఇబ్బంది పడుతున్న రణవీర్‌కు ఈ సినిమా కెరీర్‌లో పెద్ద రిలీఫ్ ఇచ్చింది. మాధవన్, సంజయ్ దత్, అక్షయ్ ఖన్నా వంటి ప్రముఖ నటులు కీలక పాత్రలు పోషించిన ఈ చిత్రం, బాలీవుడ్‌కు ఈ ఏడాది చివర్లో వచ్చిన ఒక సర్‌ప్రైజ్ హిట్‌గా నిలిచింది.

ఇదిలా ఉండగా, 'ధురంధర్' విజయాన్ని ఆస్వాదిస్తున్న రణవీర్‌కు సంబంధించి ఓ పాత వీడియో సోషల్ మీడియాలో చర్చనీయాంశంగా మారింది. ఆయన భార్య, నటి దీపికా పదుకొణె తాను రోజుకు 8 గంటలు మాత్రమే పనిచేస్తానని చేసిన వ్యాఖ్యలపై విమర్శలు వస్తున్న సంగతి తెలిసిందే. ఈ నేపథ్యంలో, రణవీర్ గతంలో పనివేళల గురించి మాట్లాడిన వీడియోను దీపికాకు కౌంటర్‌గా కొందరు వైరల్ చేస్తున్నారు.

"8 గంటల షిఫ్ట్‌లో నేను కొన్నిసార్లు 10-12 గంటలు పనిచేస్తాను. దాంతో తోటి నటీనటులు కూడా నాతో పాటు ఉండాల్సి వస్తుంది. వారి ఇతర సినిమాల షెడ్యూల్స్ దెబ్బతింటాయి. అనుకున్న షూట్ 8 గంటల్లో పూర్తి కాకపోతే, మరికొంత సమయం పనిచేయడంలో తప్పేముంది?" అని రణవీర్ ఆ వీడియోలో అన్నారు. అయితే, ఈ వీడియో ఇప్పటిది కాదు. 2022లో ఓ ఇంటర్వ్యూలో రణవీర్ మాట్లాడిన సందర్భంలోనిది. అప్పటి వీడియోను ఇప్పుడు దీపికా వ్యాఖ్యలకు ముడిపెడుతూ నెటిజన్లు వైరల్ చేస్తున్నారు.