పవన్ వల్లే ఈ సినిమా ఆలస్యమైందని చాలామంది రాశారు... కానీ!: హరీశ్ శంకర్

పవర్ స్టార్ పవన్ కల్యాణ్ నటిస్తున్న 'ఉస్తాద్ భగత్ సింగ్' సినిమా ఆలస్యం కావడానికి ఆయనే కారణమంటూ వస్తున్న వార్తలపై దర్శకుడు హరీశ్ శంకర్ పూర్తి స్పష్టతనిచ్చారు. ఈ సినిమా ఆలస్యానికి పవన్ ఏమాత్రం కారణం కాదని, కేవలం తన వల్లే కొంత జాప్యం జరిగిందని స్పష్టం చేశారు.

హైదరాబాద్‌లోని ఆదిత్య కాలేజీలో 'ఉస్తాద్ భగత్ సింగ్' చిత్రం నుంచి 'దేఖ్‌లేంగే సాలా' పాట విడుదల కార్యక్రమం ఘనంగా జరిగింది. ఈ ఈవెంట్‌లో హరీశ్ శంకర్ మాట్లాడుతూ, "పవన్‌గారితో సినిమా చేయడానికి పదేళ్లు పట్టింది. ఈ క్రమంలో ఆయన వల్లే సినిమా లేటైందని చాలా రూమర్స్ వచ్చాయి. కానీ ఆ వార్తల్లో ఏమాత్రం నిజం లేదు. అభిమానులు 'మరో గబ్బర్ సింగ్' కావాలని అడగడంతో కథను చాలాసార్లు మార్చాను. మొదట లవ్ స్టోరీ అనుకున్నాం, కానీ ఫ్యాన్స్ కోరిక మేరకు మార్పులు చేశాం. ఈ ఆలస్యం నా వల్లే జరిగింది" అని వివరించారు.

పవన్ కల్యాణ్ అంకితభావాన్ని కొనియాడుతూ, "ఆయన మంత్రివర్గ సమావేశాలు ముగించుకుని రాత్రిపూట షూటింగ్‌కు వచ్చేవారు. ఒక్కోసారి రోజుకు 20 గంటల పాటు పనిచేశారు. ఆయన డెడికేషన్ అద్భుతం" అని తెలిపారు.

మైత్రీ మూవీ మేకర్స్ నిర్మిస్తున్న ఈ చిత్రంలో శ్రీలీల, రాశీఖన్నా హీరోయిన్లుగా నటిస్తున్నారు. దేవిశ్రీ ప్రసాద్ స్వరపరిచిన 'దేఖ్‌లేంగే సాలా' పాటకు భాస్కరభట్ల సాహిత్యం అందించగా, విశాల్ ధడ్లానీ ఆలపించారు. పవన్ కల్యాణ్ ఎనర్జీ, స్టైల్‌తో ఈ పాట అభిమానులను విశేషంగా ఆకట్టుకుంటోంది. ఈ పాట విడుదలతో సినిమాపై అంచనాలు మరింత పెరిగాయి.