'అఖండ 2'కు నార్త్ లో వస్తున్న రెస్పాన్స్ పై నిర్మాతలు ఏమన్నారంటే..!

నందమూరి బాలకృష్ణ, దర్శకుడు బోయపాటి శ్రీను కాంబినేషన్‌లో వచ్చిన ‘అఖండ 2: ది తాండవం’ చిత్రం బాక్సాఫీస్ వద్ద ఘన విజయాన్ని అందుకుంది. డిసెంబర్ 12న ప్రపంచవ్యాప్తంగా విడుదలైన ఈ సినిమా, తొలి షో నుంచే హౌస్‌ఫుల్ కలెక్షన్లతో దూసుకుపోతోంది. ఈ నేపథ్యంలో చిత్ర యూనిట్ సక్సెస్ వేడుకలను నిర్వహించింది.

ఈ సందర్భంగా నిర్మాత గోపి ఆచంట మాట్లాడుతూ, కొన్ని కారణాల వల్ల సినిమా వారం రోజులు ఆలస్యమైనందుకు బాలకృష్ణకు, బోయపాటికి, బాలయ్య అభిమానులకు క్షమాపణలు తెలిపారు. ఈ సమస్య పరిష్కారంలో సహకరించిన ప్రముఖ నిర్మాత దిల్ రాజు, మ్యాంగో మీడియా రామ్‌కు ఆయన ప్రత్యేక కృతజ్ఞతలు తెలియజేశారు.

వారం ఆలస్యమైనా ప్రేక్షకుల నుంచి అద్భుతమైన స్పందన వస్తోందని గోపి ఆచంట అన్నారు. "మేము భ్రమరాంబ థియేటర్‌లో సినిమా చూశాం. అభిమానులు సీట్లలో కూర్చోకుండా నిలబడి ఈలలు, చప్పట్లతో హర్షాతిరేకాన్ని వ్యక్తం చేస్తూ, సందడి చేస్తున్నారు. మార్నింగ్, మ్యాట్నీ షోలు కూడా హౌస్‌ఫుల్ అయ్యాయి. అన్ని ప్రాంతాల నుంచి అద్భుతమైన రిపోర్ట్స్ వస్తున్నాయి" అని ఆయన వివరించారు.

తెలుగు రాష్ట్రాల్లోనే కాకుండా ఉత్తరాదిలోనూ 'అఖండ 2' మంచి ఆదరణ పొందుతోందని నిర్మాత తెలిపారు. "నార్త్‌లో జీ సినిమాస్ ద్వారా దాదాపు 800 స్క్రీన్లలో సినిమాను విడుదల చేశాం. అక్కడి ప్రేక్షకులు కూడా సినిమాను బాగా ఎంజాయ్ చేస్తున్నారని రిపోర్ట్స్ వస్తున్నాయి. మౌత్ టాక్ అద్భుతంగా ఉండటంతో టికెట్లు వేగంగా బుక్ అవుతున్నాయి" అని ఆయన పేర్కొన్నారు. త్వరలోనే తెలుగు రాష్ట్రాల్లో భారీ సక్సెస్ వేడుకలను నిర్వహించనున్నట్లు ప్రకటించారు. ఈ చిత్రాన్ని 14 రీల్స్ ప్లస్ బ్యానర్‌పై రామ్ ఆచంట, గోపి ఆచంట నిర్మించగా, తేజస్విని నందమూరి సహ నిర్మాతగా ఉన్నారు.