గూగుల్‌లో కోహ్లీని దాటేశాడు.. మైదానంలో రికార్డులు బద్దలు కొట్టాడు.. పాప్యులారిటీపై వైభవ్ కూల్ రియాక్షన్

భారత క్రికెట్‌లో ఓ యువ సంచలనం సరికొత్త రికార్డులతో హోరెత్తిస్తున్నాడు. బీహార్‌లోని సమస్తిపూర్‌కు చెందిన 14 ఏళ్ల వైభవ్ సూర్యవంశీ తన అద్భుతమైన ఆటతీరుతో అందరి దృష్టిని ఆకర్షిస్తున్నాడు. తాజాగా అండర్-19 ఆసియా కప్‌లో విధ్వంసకర ఇన్నింగ్స్‌తో చెలరేగిన వైభవ్, మరోవైపు 2025లో గూగుల్‌లో అత్యధికంగా వెతకబడిన భారతీయుడిగా నిలిచి స్టార్ బ్యాటర్ విరాట్ కోహ్లీని కూడా అధిగమించడం విశేషం.

దుబాయ్‌లోని ఐసీసీ అకాడమీ గ్రౌండ్‌లో శుక్రవారం యూఏఈతో జరిగిన మ్యాచ్‌లో వైభవ్ సూర్యవంశీ కేవలం 95 బంతుల్లో 171 పరుగులు చేసి రికార్డు సృష్టించాడు. అతని ఇన్నింగ్స్‌లో 9 ఫోర్లు, 14 భారీ సిక్సర్లు ఉన్నాయి. అండర్-19 ఆసియా కప్ చరిత్రలో ఒక భారతీయ ఆటగాడికి ఇదే అత్యధిక వ్యక్తిగత స్కోరు. అలాగే అండర్-19 స్థాయిలో ఒకే ఇన్నింగ్స్‌లో అత్యధిక సిక్సర్లు కొట్టిన బ్యాటర్‌గా కూడా వైభవ్ నిలిచాడు. యూత్‌ వన్డేల్లో భారత్ తరఫున ఇది రెండో అత్యధిక స్కోరు. 2002లో అంబటి రాయుడు ఇంగ్లండ్‌పై చేసిన 177 పరుగుల తర్వాత ఇదే ఉత్తమ ప్రదర్శన.

మ్యాచ్ అనంతరం తన అనూహ్య పాప్యులారిటీపై వైభవ్ స్పందించాడు. "గూగుల్‌లో మీరు అత్యధికంగా వెతకబడిన భారతీయుడు, ఈ విషయంలో కోహ్లీని కూడా దాటేశారు. ఇంత హైప్ మధ్య ఏకాగ్రత ఎలా నిలుపుకుంటున్నారు?" అని బ్రాడ్‌కాస్టర్ ప్రశ్నించగా, వైభవ్ ఎంతో విన‌మ్రంగా సమాధానమిచ్చాడు.

"నేను ఇలాంటి విషయాలను పెద్దగా పట్టించుకోను. నా దృష్టి అంతా నా ఆటను మెరుగుపరుచుకోవడంపైనే ఉంటుంది. ఇలాంటి వార్తలు విన్నప్పుడు సంతోషంగా అనిపిస్తుంది. దాన్ని చూసి ఆనందపడి, ఆ తర్వాత మళ్లీ నా పనిలో నేను నిమగ్నమవుతాను. అంతే" అని వైభవ్ తెలిపాడు. చిన్న వయసులోనే అద్భుతమైన ప్రతిభతో పాటు పరిణతితో కూడిన ఆలోచనా విధానం కనబరుస్తున్న ఈ యువ కెరటంపై ప్రశంసలు వెల్లువెత్తుతున్నాయి.