వెండి ధరలో సరికొత్త చరిత్ర... రూ.2 లక్షలు దాటి ఆల్ టైమ్ రికార్డ్!

బులియన్ మార్కెట్‌లో వెండి ధర సరికొత్త చరిత్ర సృష్టించింది. మల్టీ-కమోడిటీ ఎక్స్ఛేంజ్ (MCX)లో శుక్రవారం జరిగిన ఇంట్రాడే ట్రేడింగ్‌లో కిలో వెండి ధర తొలిసారిగా రూ.2 లక్షల మార్కును దాటింది. ట్రేడింగ్ సమయంలో ఒక దశలో కిలో వెండి రూ.2,01,388 ఆల్ టైమ్ గరిష్ఠ స్థాయికి చేరుకుంది.

వివరాల్లోకి వెళితే, 2026 మార్చి 5న ముగియనున్న ఫ్యూచర్ కాంట్రాక్ట్ ధర ఒకేరోజులో రూ.2,400కు పైగా పెరిగింది. చివరకు రూ.1,520 లాభంతో రూ.2,00,462 వద్ద స్థిరపడింది. రిటైల్ మార్కెట్‌లోనూ వెండి ధర భారీగా పెరిగి కిలో రూ.1,95,180కి చేరింది. ఇండియన్ బులియన్ జ్యువెలర్స్ అసోసియేషన్ (IBJA) ప్రకారం, గురువారం కిలో వెండి ధర రూ.1,86,988గా ఉంది.

గత కొన్నేళ్లుగా ఒకే పరిధిలో కదలాడిన వెండి ధర, పదేళ్ల స్తబ్దతను ఛేదించి బయటపడిందని యాక్సిస్ సెక్యూరిటీస్ తన నివేదికలో పేర్కొంది. ఇది దీర్ఘకాలిక బుల్ ట్రెండ్‌కు సంకేతమని విశ్లేషించింది. అంతర్జాతీయ మార్కెట్‌లోనూ వెండి ధర ఔన్సుకు 64 డాలర్లను అధిగమించింది. 50 డాలర్ల కీలక నిరోధాన్ని దాటడంతో, భవిష్యత్తులో 76 నుంచి 80 డాలర్ల స్థాయికి చేరుకునే అవకాశం ఉందని నిపుణులు అంచనా వేస్తున్నారు.

మరోవైపు, బంగారం ధరలు కూడా భారీగా పెరిగాయి. ఎంసీఎక్స్‌లో 10 గ్రాముల బంగారం (ఫిబ్రవరి 5 కాంట్రాక్ట్) ధర 1.87 శాతం పెరిగి రూ.1,34,948 వద్ద ముగిసింది. రిటైల్ మార్కెట్‌లో 24 క్యారెట్ల 10 గ్రాముల బంగారం ధర రూ.4,600కు పైగా పెరిగి రూ.1,32,710కి చేరినట్లు ఐబీజేఏ తెలిపింది.