రాహుల్ గాంధీ సమావేశానికి దూరంగా శశి థరూర్.. వరుసగా మూడో భేటీకి దూరం!

కాంగ్రెస్ పార్టీ సీనియర్ నేత, తిరువనంతపురం ఎంపీ శశి థరూర్ మరోసారి పార్టీ కీలక సమావేశానికి గైర్హాజరయ్యారు. గత మూడు వారాల్లో ఆయన పార్టీ అధికారిక భేటీకి రాకపోవడం ఇది మూడోసారి కావడం గమనార్హం. పార్టీ అధిష్ఠానంతో ఆయనకు విభేదాలున్నాయనే ప్రచారానికి ఈ తాజా పరిణామం మరింత బలాన్నిస్తోంది.

లోక్‌సభ శీతాకాల సమావేశాలు వచ్చే వారం (డిసెంబర్ 19) ముగియనున్న నేపథ్యంలో, పార్టీ పనితీరును సమీక్షించేందుకు ఈరోజు రాహుల్ గాంధీ కాంగ్రెస్ ఎంపీలతో సమావేశం నిర్వహించారు. ఈ ముఖ్యమైన భేటీకి శశి థరూర్ హాజరు కాలేదు. ఇదే సమయంలో, తాను వ్యక్తిగత కార్యక్రమాల కోసం కోల్‌కతాలో ఉన్నానని ఆయన ఎక్స్ వేదికగా తెలిపారు. తన చిరకాల సహాయకుడి వివాహానికి, సోదరి పుట్టినరోజు వేడుకలకు హాజరైనట్లు పేర్కొన్నారు. ఈ సమావేశానికి మరో ఎంపీ మనీశ్ తివారీ కూడా రాలేదు.

ఇటీవల కాలంలో థరూర్ పార్టీ సమావేశాలకు దూరంగా ఉంటున్నారు. నవంబర్ 30న సోనియా గాంధీ అధ్యక్షతన జరిగిన వ్యూహ కమిటీ సమావేశానికి, నవంబర్ 18న ఖర్గే, రాహుల్ నేతృత్వంలో జరిగిన మరో భేటీకి కూడా ఆయన వివిధ కారణాలతో హాజరు కాలేదు.

కొంతకాలం క్రితం ప్రధాని నరేంద్ర మోదీ ప్రసంగాన్ని ప్రశంసిస్తూ థరూర్ చేసిన వ్యాఖ్యలు కాంగ్రెస్‌లో తీవ్ర దుమారం రేపాయి. కొందరు కాంగ్రెస్ నేతలు ఆయనపై బహిరంగంగానే విమర్శలు గుప్పించారు. ఈ వివాదం తర్వాత థరూర్ పార్టీ కార్యక్రమాలకు మరింత దూరంగా ఉంటుండటంతో, అధిష్ఠానంతో ఆయనకు దూరం పెరిగిందనే చర్చ రాజకీయ వర్గాల్లో జోరుగా సాగుతోంది.