వైభవ్ సూర్యవంశీ విధ్వంసం.. 95 బంతుల్లోనే 171 ర‌న్స్‌

దుబాయ్‌లో జరుగుతున్న అండర్-19 ఆసియా కప్‌లో భారత యువ సంచలనం వైభవ్ సూర్యవంశీ అద్భుతమైన సెంచరీతో కదం తొక్కాడు. యూఏఈతో జరుగుతున్న తొలి మ్యాచ్‌లో ఈ లెఫ్ట్ హ్యాండర్ కేవలం 95 బంతుల్లోనే 171 పరుగులు చేసి విధ్వంసం సృష్టించాడు. అతని ఇన్నింగ్స్‌లో ఏకంగా 14 భారీ సిక్సర్లతో పాటు 9 ఫోర్లు ఉండటం విశేషం. ఈ మెరుపు ఇన్నింగ్స్‌తో భారత జట్టు భారీ స్కోరు వైపు దూసుకెళ్తోంది.

దుబాయ్‌లోని ఐసీసీ అకాడమీ గ్రౌండ్‌లో జరుగుతున్న ఈ మ్యాచ్‌లో టాస్ గెలిచిన యూఏఈ తొలుత బౌలింగ్ ఎంచుకుంది. దీంతో బ్యాటింగ్‌కు దిగిన భారత్‌కు ఓపెనర్ వైభవ్ సూర్యవంశీ అసాధారణ ఆరంభాన్ని ఇచ్చాడు. కెప్టెన్ ఆయుశ్‌ మాత్రేతో కలిసి ఇన్నింగ్స్ ప్రారంభించిన వైభవ్, ఆరంభం నుంచే యూఏఈ బౌలర్లపై విరుచుకుపడ్డాడు. తన పవర్‌ఫుల్ షాట్లతో మైదానం నలువైపులా బౌండరీలు, సిక్సర్లు బాదుతూ స్కోరు బోర్డును పరుగులు పెట్టించాడు.

ఈ భారత యువ జట్టులో కెప్టెన్ ఆయుశ్‌ మాత్రే, వైస్-కెప్టెన్ విహాన్ మల్హోత్రా వంటి ప్రతిభావంతులైన ఆటగాళ్లు ఉన్నారు. గతేడాది ఇదే వేదికపై బంగ్లాదేశ్ చేతిలో ఫైనల్‌లో ఓటమి పాలైన భారత జట్టు, ఈసారి ఎలాగైనా కప్ గెలవాలనే పట్టుదలతో టోర్నీని ఆరంభించింది. వైభవ్ సూర్యవంశీ అద్భుతమైన ఫామ్‌తో టోర్నీని ఘనంగా ప్రారంభించడం జట్టు ఆత్మవిశ్వాసాన్ని మరింత పెంచింది.