చిన్నస్వామి స్టేడియంలో మళ్లీ మ్యాచ్‌లు?.. డీకే శివకుమార్ ఏమ‌న్నారంటే..!

బెంగళూరులోని చిన్నస్వామి స్టేడియంలో అంతర్జాతీయ, ఐపీఎల్ మ్యాచ్‌ల నిర్వహణకు కర్ణాటక ప్రభుత్వం సానుకూలంగా ఉన్నట్లు సంకేతాలిచ్చింది. కర్ణాటక ఉప ముఖ్యమంత్రి డీకే శివకుమార్ ఈ విషయంపై తాము సానుకూల దృక్పథంతో ఉన్నామని స్పష్టం చేశారు. ఇవాళ‌ బెళగావిలో ఆయన మీడియాతో మాట్లాడారు.

కర్ణాటక రాష్ట్ర క్రికెట్ అసోసియేషన్ (కేఎస్‌సీఏ) నూతన అధ్యక్షుడు, మాజీ క్రికెటర్ వెంకటేశ్ ప్రసాద్ నేతృత్వంలోని బృందం ఇటీవల ముఖ్యమంత్రి సిద్ధరామయ్యను, తనను కలిసి ఒక వినతిపత్రం సమర్పించిందని శివకుమార్ తెలిపారు. ఈ అంశాన్ని త్వరలోనే కేబినెట్ సమావేశంలో చర్చిస్తామని ఆయన వెల్లడించారు. "చిన్నస్వామి స్టేడియం వద్ద జరిగిన తొక్కిసలాట ప్రమాదం జరగాల్సింది కాదు. కానీ, జరిగింది. అక్కడ చాలా లోపాలు ఉన్నాయి. వాటన్నింటినీ సరిదిద్ది, ప్రేక్షకుల నిర్వహణకు ప్రత్యేక మార్గదర్శకాల ప్రకారం చర్యలు తీసుకోవాలి" అని ఆయన అన్నారు.

ఈ ఏడాది జూన్ 4న స్టేడియం వద్ద జరిగిన తొక్కిసలాటలో 11 మంది మరణించిన ఘటన తర్వాత అక్కడ ఎలాంటి మ్యాచ్‌లు జరగలేదు. ఈ నేపథ్యంలో డీకే శివకుమార్ మాట్లాడుతూ, "వ్యక్తిగతంగా నేను ఈ విషయంలో సానుకూలంగా ఉన్నాను. మన రాష్ట్ర ప్రతిష్ఠ‌కు భంగం వాటిల్లనివ్వకూడదు. అందుకే కేబినెట్‌లో చర్చించి తుది నిర్ణయం తీసుకుంటాం" అని పేర్కొన్నారు.

క్రికెట్ మ్యాచ్‌లను ఆపే ఉద్దేశం తమకు లేదని, అయితే ప్రేక్షకుల భద్రతా చర్యలను క్షుణ్ణంగా పరిశీలించాల్సి ఉందని డీకే శివకుమార్ స్పష్టం చేశారు. జస్టిస్ మైఖేల్ డి'కున్హా కమిటీ సిఫార్సులను దశలవారీగా అమలు చేస్తామని, దీనికి వెంకటేశ్ ప్రసాద్ కూడా అంగీకరించారని తెలిపారు. ఐపీఎల్ అయినా, మరే ఇతర మ్యాచ్ అయినా బెంగళూరు నుంచి తరలించేందుకు ఒప్పుకోమని, అవసరమైతే కొత్త స్టేడియాల నిర్మాణంపై కూడా చర్చిస్తామని ఆయన హామీ ఇచ్చారు.