రూ.11 కోట్లతో ఔషధ భవనాలు.. ప్రారంభించిన మంత్రి సత్యకుమార్

రాష్ట్రంలో మందుల నాణ్యత నియంత్రణను పటిష్ఠం చేసే దిశగా ఆంధ్రప్రదేశ్ ప్రభుత్వం కీలక ముందడుగు వేసింది. రూ.11.12 కోట్ల వ్యయంతో నూతనంగా నిర్మించిన 11 ఔషధ పరిపాలన భవనాలను, టెస్టింగ్ ల్యాబ్‌లను రాష్ట్ర వైద్య, ఆరోగ్య శాఖ మంత్రి సత్యకుమార్ యాదవ్ నిన్న వర్చువల్‌గా ప్రారంభించారు. మంగళగిరిలోని ఆరోగ్య శాఖ కార్యాలయం నుంచి ఆయన ఈ కార్యక్రమాన్ని ప్రారంభించగా, సంబంధిత నియోజకవర్గాల్లో స్థానిక ఎమ్మెల్యేలు పాల్గొన్నారు.

విశాఖపట్నం, శ్రీకాకుళం, అమలాపురం, నరసరావుపేట, ఒంగోలు, కావలి, నెల్లూరు, తిరుపతి, చిత్తూరు, మదనపల్లె, కర్నూలులో ఈ కొత్త కార్యాలయాలు అందుబాటులోకి వచ్చాయి. వీటిలో విశాఖ, కర్నూలులో ప్రాంతీయ ప్రయోగశాలలను కూడా ఏర్పాటు చేశారు. ఈ కొత్త భవనాల వల్ల ప్రభుత్వానికి ఏటా అద్దెల రూపంలో చెల్లించే రూ.15 లక్షలు ఆదా కానుంది.

ఈ సందర్భంగా మంత్రి సత్యకుమార్ మాట్లాడుతూ.. ప్రస్తుతం విజయవాడ ల్యాబ్‌లో ఏటా 4 వేల మందుల నమూనాలను పరీక్షిస్తుండగా, కొత్త ప్రాంతీయ ల్యాబ్‌ల వల్ల ఈ సంఖ్య మరో 3 వేలు పెరుగుతుందని తెలిపారు. మరో మూడు నెలల్లో విజయవాడలో రాష్ట్ర స్థాయి ల్యాబ్ అందుబాటులోకి వస్తుందని, అక్కడ మరో 7 వేల పరీక్షల సామర్థ్యం ఉంటుందని వివరించారు. దీనివల్ల కల్తీ, కాలం చెల్లిన మందులను వేగంగా గుర్తించడం సాధ్యమవుతుందని అన్నారు.

రోగులపై ఆర్థిక భారం తగ్గించడమే లక్ష్యమని మంత్రి స్పష్టం చేశారు. మండల స్థాయిలో జన ఔషధి కేంద్రాలు ఏర్పాటు చేయనున్నట్లు తెలిపారు. ఔషధ నియంత్రణ శాఖలో ఖాళీ పోస్టులను త్వరలోనే భర్తీ చేస్తామని హామీ ఇచ్చారు. అదే సమయంలో, విధి నిర్వహణలో అవినీతిని, నిర్లక్ష్యాన్ని సహించేది లేదని అధికారులను గట్టిగా హెచ్చరించారు. ఈ కార్యక్రమంలో ఔషధ నియంత్రణ శాఖ డైరెక్టర్ జనరల్ గిరీశా, డైరెక్టర్ ఎంపీఆర్ ప్రసాద్ తదితర ఉన్నతాధికారులు పాల్గొన్నారు.