Ravichandran Ashwin: సన్నీ లియోన్ ఫొటో పోస్ట్ చేసిన అశ్విన్.. అసలు కథేంటి?

టీమిండియా మాజీ స్టార్ స్పిన్నర్ రవిచంద్రన్ అశ్విన్ సోషల్ మీడియాలో చేసిన ఓ పోస్ట్ అందరినీ ఆశ్చర్యానికి గురిచేసింది. బాలీవుడ్ నటి సన్నీ లియోన్ ఫొటోను షేర్ చేసి నెటిజన్లను కాసేపు కన్‌ఫ్యూజ్ చేశాడు. సయ్యద్ ముస్తాక్ అలీ ట్రోఫీలో అద్భుతంగా రాణించిన యువ ఆటగాడు సన్నీ సంధును అభినందించేందుకే ఆయన ఈ వినూత్న మార్గాన్ని ఎంచుకున్నాడు.

తన 'ఎక్స్' ఖాతాలో అశ్విన్ ఒకవైపు సన్నీ లియోన్ చిత్రాన్ని, మరోవైపు చెన్నైలోని ఓ వీధి ఫొటోను జతచేసి పోస్ట్ చేశాడు. దీనిని డీకోడ్ చేసిన అభిమానులు.. సన్నీ (లియోన్), సంధు (వీధి)లను కలిపి 'సన్నీ సంధు'ను ఉద్దేశించి ఈ పోస్ట్ పెట్టారని గ్రహించారు. ప్రస్తుతం ఈ ట్వీట్ సోషల్ మీడియాలో వైరల్‌గా మారింది.

విషయంలోకి వెళితే, సయ్యద్ ముస్తాక్ అలీ ట్రోఫీ-2025లో భాగంగా సౌరాష్ట్రతో జరిగిన మ్యాచ్‌లో తమిళనాడు 3 వికెట్ల తేడాతో విజయం సాధించింది. మొదట బ్యాటింగ్ చేసిన సౌరాష్ట్ర 20 ఓవర్లలో 8 వికెట్లకు 183 పరుగులు చేసింది. అనంతరం 184 పరుగుల లక్ష్యంతో బరిలోకి దిగిన తమిళనాడు, 18.4 ఓవర్లలోనే లక్ష్యాన్ని ఛేదించింది.

ఈ మ్యాచ్‌లో ఓపెనర్ సాయి సుదర్శన్ (101 నాటౌట్) అజేయ శతకంతో కదం తొక్కగా, చివర్లో బ్యాటింగ్‌కు వచ్చిన సన్నీ సంధు కేవలం 9 బంతుల్లోనే 30 పరుగులు చేసి జట్టుకు అద్భుత విజయాన్ని అందించాడు. ఈ మెరుపు ఇన్నింగ్స్ తర్వాతే అశ్విన్.. సన్నీ సంధును ప్రశంసిస్తూ ఈ క్రియేటివ్ పోస్ట్ పెట్టాడు.