లండన్‌లో లలిత్ మోదీ బర్త్‌డే పార్టీ... సందడి చేసిన విజయ్ మాల్యా

ఇండియన్ ప్రీమియర్ లీగ్ (ఐపీఎల్) మాజీ ఛైర్మన్ లలిత్ మోదీ లండన్‌లో తన 63వ పుట్టినరోజును ఘనంగా జరుపుకున్నారు. గత వారాంతంలో జరిగిన ఈ పార్టీకి ఆయన సన్నిహితులతో పాటు, పరారీలో ఉన్న మరో భారత వ్యాపారవేత్త విజయ్ మాల్యా కూడా హాజరయ్యారు. ఈ వేడుకకు సంబంధించిన వీడియోలను లలిత్ మోదీ తన ఇన్‌స్టాగ్రామ్‌లో పంచుకున్నారు.

లండన్‌లోని మేఫెయిర్‌లో ఉన్న ఖరీదైన మ్యాడాక్స్ క్లబ్‌లో ఈ పార్టీ జరిగింది. ఈ క్లబ్‌లో ఒక టేబుల్ కోసం కనీసం వెయ్యి పౌండ్లు (సుమారు రూ. 1.18 లక్షలు) ఖర్చు చేయాల్సి ఉంటుందని సమాచారం. పార్టీలో స్నేహితుల మధ్య కేక్ కట్ చేయడం, డ్యాన్స్ చేయడం వంటి దృశ్యాలు వీడియోల్లో ఉన్నాయి. తన భాగస్వామి రీమా బౌరీకి ధన్యవాదాలు తెలుపుతూ, "ఈ పుట్టినరోజు కుటుంబం, స్నేహితులతో ఎంతో అందంగా గడిచింది. నా జీవిత భాగస్వామి రీమా, నువ్వు అద్భుతమైన పార్టీ ఇచ్చావు" అని లలిత్ మోదీ పోస్ట్ చేశారు.

భారత్‌లో తీవ్రమైన ఆర్థిక నేరారోపణలు ఎదుర్కొంటున్న లలిత్ మోదీ, విజయ్ మాల్యా చాలా కాలంగా యూకేలోనే నివసిస్తున్నారు. గత జులైలో కూడా వీరిద్దరూ లండన్‌లో జరిగిన ఓ ప్రైవేట్ పార్టీలో కలిసి పాటలు పాడుతూ కనిపించారు.

మనీ లాండరింగ్, ఫెమా ఉల్లంఘనల కేసుల్లో ఆరోపణలు ఎదుర్కొంటున్న లలిత్ మోదీ 2010లో భారత్ విడిచి వెళ్లారు. కింగ్‌ఫిషర్ ఎయిర్‌లైన్స్ రుణాల ఎగవేత కేసులో విజయ్ మాల్యాను భారత్ ఆర్థిక నేరగాడిగా ప్రకటించిన విషయం తెలిసిందే. ప్రస్తుతం ఇద్దరూ లండన్‌లోనే ఉంటూ తమపై ఉన్న కేసులను ఎదుర్కొంటున్నారు.